1994 йили Жаҳон чемпионатининг бронза медалига эгалик қилган Швеция терма жамоасининг собиқ ҳужумчиси Клас Игнессон 47 ёшида Стокгольмда вафот этди, дея хабар беради vesti.ru. Унинг ўлимига бир неча йилдан бери курашиб келаётган оққон касали сабаб қилиб кўрсатилмоқда.
2009 йилда Класга қон саратони ташхиси қўйилган ва у тузалиб кетган эди. Бироқ 2013 йили Ингессон касаллик қайтганлигини ва операцияга тайёргарлик кўраётганлигини маълум қилди.
Ингессон Швеция тарихидаги энг яхши футболчилардан бири ҳисобланади. У "Гетеборг"(Швеция), "Мехелен"(Бельгия), ПСВ "Эйндховен" (Голландия), "Шеффилд Уэнсдей" (Англия) "Марсель" (Франция) ва Италиянинг "Бари", "Болонья" ва "Лечче" клубларида ҳам тўп сурган.
Швеция термаси жамоаси сафида 57 та учрашувда майдонга тушган ва 13 та гол уришга муваффақ бўлган. Игнессон ЖЧ-94 ва Евро-92ларнинг бронза медали соҳиби бўлган.
