Тошкент шаҳрида навбатдаги фирибгарлик ҳолати қайд этилди.
Маълум бўлишича, 4 январь куни соат 12.30 да 14.00 гача бўлган вақт ичида Олой бозоридаги заргарлик дўконларидан бирининг ёнида номаълум аёл 57 ёшли Муҳаббат Н.нинг ишончига кириб, алдов йўли билан жабрланувчидан қиймати 13 500 АҚШ долларига тенг бўлган сариқ металлдан тайёрланган заргарлик буюмларини олган.
Ушбу буюмларнинг эвазига нотаниш аёл жабрланувчига конверт бериб, унинг ичида 30 минг АҚШ доллари борлигига ишонтирган. Аслида эса конвертнинг ичига газета қоғозининг қирқилган бўлаклари жойланган эди.
Шундан сўнг номаълум аёл заргарлик дўконига кириб, уни бошқа эшикдан тарк этган.
ИИББ ходимлари томонидан кўрилган чоралар натижасида, гумонланувчи, Самарқанд вилоятида яшовчи 53 ёшли Инобат А. қўлга олинди. Унга нисбатан Ўзбекистон Республикаси Жиноят кодексининг 168 моддаси 4 қисми (“Фирибгарлик”) бўйича жиноий иш қўзғатилди.
