Касби туманидаги "Хушназаров Оғабек Акрамович" фермер хўжалиги раҳбари Акрам Жабборов бу йил 30 гектар ерда пахта етиштириб, 157 тонна ҳосил олган. Шу боис Ўзбекистонда ишлаб чиқарилган автомашиналардан бирини навбатсиз харид қилган.
Фермернинг айтишича, ўтган йили ҳам бу имтиёзга эришиш учун ҳаракат қилган, бироқ, пахта ҳосили 35 центнерни ташкил қилган.
Туманда Акрам Жабборовдан ташқари, яна 12 нафар энг илғор фермер хўжалиги раҳбарлари ҳам "General Motors Uzbekistan" ЁАЖда ишлаб чиқарилган "Нексия", "Ласетти", "Кобалт" ва "Каптива" машиналарини навбатсиз харид қилишган.
Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлиги томонидан 2013 йил 26 сентябрда тасдиқланган “Пахта хомашёсини етиштиришда юқори ҳосилдорликка эришган фермер хўжаликларини рағбатлантириш тартиби тўғрисида”ги низомга асосан, республикамизда ишлаб чиқарилган енгил автотранспорт воситаларини пул ўтказиш йўли билан навбатсиз харид қилиш имконияти 20 гектардан ортиқ майдонда 40 центнердан ошириб пахта етиштирган фермер хўжаликларига берилади.
Қашқадарё вилоят фермерлар кенгашидан олинган маълумотларга қараганда, бугунги кунга қадар вилоятда ҳосилдорликни гектарига 40 центнердан оширган 312 та фермер хўжалиги навбатсиз тегишли автомобиллардан харид қилиш имконига эга бўлган.
Манба: “Қашқадарё” газетаси
