Тошкент вилояти божхона бошқармасининг “Ғишткўприк” чегара божхона постида фуқаро Т.Н. холислар иштирокида шахсий кўрикдан ўтказилганида, унинг қўл юклари орасида ва этиги ичига яширилган, оғзаки сўровда тақдим этилмаган ва йўловчи божхона декларациясида ёзиб кўрсатилмаган қиймати 7 миллион 560 минг сўмлик, жами оғирлиги 252 грамм бўлган 39 дона оқ рангли металдан ясалган заргарлик буюмларини мамлакатимизга яширинча олиб келаётганида тўхтатиб қолинди.
Фуқаро У.А. эса божхона декларациясида кўрсатилмаган, жами оғирлиги 335 грамм бўлган, оқ металдан ясалган умумий қиймати 10 миллион 50 минг сўмлик яъни, 45 дона заргарлик буюмларини божхона назоратидан яширгани аниқланди.
Яна бир ҳолатда, божхоначиларда эътиборини тортган фуқаро М.Г. холислар иштирокида шахсий кўрикдан ўтказилганида, оёғидаги қора рангли туфлисининг ички товон қисмига 2 дона целлофан пакетда қиймати 21 миллион сўмлик, оғирлиги 70 грамм бўлган 17 дона сариқ металлдан ясалган заргарлик буюмларини қўшни мамлакатдан яшириб олиб кираётганлиги фош қилинди.
Давлат божхона қўмитаси ахборот хизматининг маълумотига кўра, ҳозирда ушбу ҳолатлар юзасидан божхона текширувлари давом эттирилмоқда.
Эслатиб ўтамиз, юртимизда фуқароларга ўз эҳтиёжлари учун 65 грамгача заргарлик буюмларини божхона тўловларисиз олиб киришга рухсат этилган.
