“Ўзагротехсаноатхолдинг” АЖ таркибидаги тизим корхоналар томонидан замонавий электротракторлар ишлаб чиқариш лойиҳаси бўйича иш бошланди. Ушбу лойиҳани амалга оширишда “Ўзагротехсаноатхолдинг” АЖ Австриянинг дунёга машҳур “AVL” компанияси билан ҳамкорликни йўллга қўяди. Бу ҳақда 2019 йилнинг 12 феврал куни “Ўзагротехсаноатхолдинг” АЖ раҳбарияти ҳамда “AVL” компанияси вакиллари ўртасида бўлиб ўтган учрашувда маълум қилинди.
Шунингдек, учрашувда “Ўзагротехсаноатхолдинг” АЖ таркибидаги тизим корхоналар томонидан ишлаб чиқарилаётган 100 от кучигача бўлган тракторларни тўлиқ электрлаштириш бўйича музокаралар олиб борилди. Унга кўра 2019 йил якунигача “AVL” компанияси янги электротракторларнинг консептуал лойиҳаларини тайёрлайди. Илк намуналар эса “Ўзагротехсаноатхолдинг” АЖ таркибидаги тизим корхоналар томонидан 2021 йилда ишлаб чиқарилади.
Маълумот ўрнида айтиб ўтамиз, “Ўзагротехсаноатхолдинг” АЖ дунё миқёсида нефт ва нефт маҳсулотлари, асосан, дизел ёқилғиси нархи ошиб бораётганлиги сабабли электротракторлар ишлаб чиқаришни йўлга қўймоқчи. Ушбу лойиҳани амалга ошириш орқали табиатни асрашга ҳисса қўшиш ҳам мақсад қилинган.
