Ўзбекистон Республикаси Президенти Ислом Каримов 11 ноябрь куни Оқсаройда Америка — Ўзбекистон савдо палатасининг (АЎСП) навбатдаги мажлисида иштирок этиш учун Ўзбекистонга келган АЎСП Раиси Кэролин Лэммни қабул қилди. Бу ҳақда Ўзбекистон Миллий ахборот агентлиги хабар бермоқда.
АҚШнинг етакчи компания ва фирмалари вакиллари делегациясининг Ўзбекистонга бу галги ташрифи Америка бизнесининг Ўзбекистонга қизиқиши ортиб бораётганидан, икки томонлама савдо-иқтисодий ва инвестициявий ҳамкорликни янада кенгайтиришга интилишидан далолат беради.
Давлат раҳбари меҳмонни Ўзбекистонга ташрифи билан қутлар экан, Америка — Ўзбекистон савдо палатаси 20 йилдан зиёд вақт давомида Ўзбекистон билан АҚШ ўртасидаги ўзаро муносабатларни ривожлантиришга кўмаклашиб келаётганини таъкидлади.
Америка — Ўзбекистон савдо палатаси Раиси Кэролин Лэмм. Фото: ЎзА
Айни пайтда ушбу ноҳукумат нотижорат ташкилотга Американинг «Боинг», «Женерал Моторз», «Женерал Электрик», «Ханиуэлл», «Рио Тинто», «Сеппелин», «Локхид Мартин», «Мерк», «Уайт энд Кейс», «Солар Турбинз», «ЭфЭмЭн Интернэшнл» каби 17 етакчи компанияси аъзодир.
Кэролин Лэмм Ислом Каримовга самимий қабул ва Америка — Ўзбекистон савдо палатаси фаолиятини ҳар томонлама қўллаб-қувватлаётгани учун миннатдорлик билдирди.
Учрашувда иқтисодиёт ва инвестициялар соҳасидаги ўзаро муносабатларни ривожлантириш истиқболлари бўйича ҳам фикр алмашилди.
Музокара якунида Ўзбекистонни глобал бизнес соҳасида етакчи мамлакат сифатида ривожлантириш йўлидаги улкан хизматлари учун Президент Ислом Каримовга «Биллур глобус» тақдим этилди.
