Аномал жазирама туфайли Франциянинг 4 та департаментида хавфнинг энг юқори қизил даражаси эълон қилинди. Бу ҳақда Euronews.com нашри хабар берди.
Мамлакат жануби-шарқида жойлашган Гар, Эро, Буш-лю-Рон ва Воклюз департаментларида термометр кўрсаткичлари рекорд натижаларни қайд этмоқда. Мутахассислар мамлакатда метео кузатувлар тарихидаги энг кучли жазирама қайд этилиши мумкинлигидан огоҳлантиришмоқда. Соғлиқни сақлаш вазирлиги бу каби ҳолатдан соғлом одамлар ҳам жабрланиши мумкинлигини айтмоқда. Мамлакат шифохоналари иссиқдан азият чекканлар билан тўлиб-тошган. Интенцив жисмоний зўриқиш натижасида 4 кишининг чўкиб, ҳалок бўлгани айтилмоқда. Мамлакатнинг яна 76 та департаментида ҳарорат сабаб хавфнинг юқори даражаси сақланиб турибди. Ҳозирда Африкадан кириб келган иссиқ ҳаво оқими Европанинг аксарият давлатларини қамраб олган.
