Бухоро вилояти божхона бошқармаси “Олот” чегара божхона комплекси ходимлари томонидан божхона қоидабузарликларини содир этган “тадбиркорлар”нинг қинғир ишларига чек қўйилди. Бу ҳақда uz24.uz нашри Бухоро вилояти божхона бошқармасининг ахборот хизмати берган маълумотларга таяниб, хабар беради.
Жумладан, Бирлашган Араб Амирликларидан юртимизга кириб келган чет эл фуқароси бошқарувидаги юк автомашинасига ортилган контейнер амалдаги тартибларга мувофиқ кўздан кечирилганда, унга ортилган товарлар билан юк-кузаутв ҳужжатларида қайд этилган товарлар бир-биридан мутлақо фарқ қилиши аниқланди.
Ҳужжатларга асосланилса, мазкур контейнерда асосан қурилиш материаллари самарқандлик хусусий тадбиркор номига юборилиши керак эди. Аммо, контейнер текширув аппаратидан ўтказилганда, унинг ичида идишларда суюқлик маҳсулотлари борлиги аён бўлди.
Контейнерда ҳужжатларда кўрсатилган товарлардан фақатгина “гранит тоши” товари борлиги, боз устига у ҳам қайд этилган миқдордан салкам 6 тонна кам эканлиги, ҳужжатларда номлари кўрсатилган бошқа товарлар эса контейнерда умуман мавжуд эмаслиги аниқланди. Уларнинг ўрнига эса ҳужжатларда кўрсатилмаган, умумий қиймати 737миллион сўмдан ортиқ бўлган 115 номдаги товар-моддий бойликлари борлиги аниқланди.
Ҳозирда ушбу ҳолат юзасидан божхона текширувлари ва суриштирув ҳаракатлари давом эттирилмоқда.
