Икки қизнинг отаси Жўрабек Ҳошимов (исм-фамилиялар ўзгартирилган) ичкиликка ружу қўйиб, хотини Назокат билан тез-тез жанжаллаша бошлади, деб ёзмоқда uz24.uz нашри "Ҳуқуқ" газетасига таянган ҳолда.
Кунларнинг бирида ишдан тушлик қилиш мақсадида уйига келган Жўрабек дастурхон устида икки қизи Наима ва Нигоранинг олдида аёли билан гап талашиб, тортишиб қолди. Уларнинг жанжалига аралашган қизи Наимага ҳам дўқ-пўписа қилди. Овқатланиб бўлишгач, Жўрабек бироз мизғиб олиш мақсадида меҳмонхонага кириб кетди.
Бироқ қизи Наима тушлик маҳалидаги отасининг онасига қилган муомаласи-ю ўзига қилган пўписаларини "ҳазм" қилолмай, онаси учун отасидан қасос олмоқчи бўлди. Шайтон васвасасига учган қиз айни пайтда бутунлай ақлу ҳушидан айрилган эди... Қозонда қизиётган пахта ёғини ухлаб ётган отасининг устидан қуйиб юборди. Қайноқ ёғдан бош, юз ва елкалари куйган ота додлаб уйғониб қараса, тепасида қозон кўтарганча қизи Наима турарди. У ўрнидан туришга чоғланган отасига қозондаги қолган ёғни ҳам қуйиб юборди.
Ачишиш ва оғриқдан азоб чекаётган отасининг: «Нега бундай қилдинг, қизим?» — деган саволига эса "Онамни сиз шунча пайтдан буён ҳақорат қилиб, қийнаб келяпсиз. Сиз ҳам қийналиш қандай бўлишини бир кўрингчи", — деди тап тортмай.
Қўшни хонадан югуриб чиққан онаси тутақиб, қизига бақира кетди ва тез ёрдам чақирди. Жигарпорасининг қилмишидан ҳам тани, ҳам дили озор чеккан Жўрабек касалхонада ўн кун даволаниб чиқди.
Ота ўз фарзандига ёмонликни раво кўрармиди. У қизининг қилмишини кечирди. Суд судланувчи Наима Ҳошимовага нисбатан қилмишига яраша жазо тайинлади. Бу ҳақда хабар берган Ўзбекистон бош прокуратурасининг “Ҳуқуқ” нашри судланувчига қандай жазо тайинлангани ва воқеа қаерда рўй бергани ҳақида маълум қилмаган.
