Айни вақтда эркин агент мақомида бўлиб турган Ўзбекистон миллий терма жамоаси сардори Сервер Жепаров Осиё Кубоги давомида янги клуб билан шартнома имзолаш истагида эканини билдирди. Бу ҳақида ярим ҳимоячи Heraldsun.com.au интернет нашри билан қилган суҳбати давомида сўзлаб берган.
Австралиялик журналистлар Сервер Жепаров мусобақа давомида Австралия клублари эътиборини тортиши мумкинлигини билдирганлар. Ўз навбатида Сервер Жепаров "Сеонгнам"да фаолиятини давом эттиришни исташини, аммо янги шартнома борасида таклиф тушмаса, Австралия чемпионатига ўтишга тайёрлигини билдирган.
"Мен ўз вақтида австралиялик футболчи Брендан Хэмилл билан бирга ўйнаганман. У менга Австралия ҳақида кўп нарсалар айтиб берган. Шундай экан, бу ер билан яхши танишман, деб айта оламан.
Агарда Австралия клубларидан таклиф бўлса, кўриб чиқишга тайёрман", - дейди Сервер Жепаров.
Шунингдек Сервер Жепаров яна камида уч йил футболчилик фаолиятини давом эттириши ва асосий мақсад сифатида Ўзбекистон миллий терма жамоаси билан 2018 йили Россияда бўлиб ўтадиган жаҳон чемпионатида иштирок этишни исташини билдирган.
Манба: www.uff.uz
