Америкалик таниқли профессионал бокс экспертларидан бири Дэн Рафаэль берган маълумотларга кўра, жаҳоннинг энг кучли боксчиларидан бири, филиппинлик Мэнни Пакьяо америкалик Флойд Мейвезерга қарши жанг учун барча шартларга розилик билдирган.
Мэнни гонорарларнинг 60-40 кўринишида Флойд фойдасига тақсимланишига ва кенгайтирилган, мураккаб доппинг-тест топширишга ҳам розилик билдирган. Таъкидлаш жоиз, Пакьяо бундан аввалги иккита жангида янада қийинроқ тестлардан ўтган.
Боксчиларнинг қўлқоплари борасида тўхталганда, томонлар ҳар икки боксчи ўзи учун маъқул бўлган қўлқопларда жанг қилишига келишиб олишди. Мейвезер одатда Grant фирмасининг қўлқопларидан фойдаланса, Мэнни жангларга Cleto Reyes қўлқопларида чиқади.
Рафаэльнинг сўзларига қараганда, ҳал қилувчи гап фақатгина Флойдда қолди. У бор йўғи шартномага имзо чекса бўлгани. Яна бир эътиборли мутахассислардан бири Кевин Айоли эса чипталарнинг нархи рекорд даражада бўлишини хабар қилди.
Шу кунга қадар энг қиммат билет 2500 доллар бўлган ва у 2013 йили Флойд Мейвезер – Сауль Альварес жанги олдидан сотилган. Ўшанда чипталар сотувидан тушган умумий даромат миқдори 20 миллион долларни ташкил қилиб, тарихдаги энг йирик кўрсатгични қайд қилган. Мейвезер – Пакьяо жангидаги энг қиммат билет 5 минг доллар бўлиши таҳмин қилинмоқда ва ундан келадиган фойда 40 миллион атрофида баҳоланмоқда.
