Дарҳақиқат, янги йилда спорт ихлосмандларининг зерикиб қолишга асос йўқ. Чунки, кириб келган йилимиз спортнинг турли йўналишлари бўйича мусобақаларга бой бўлиши кутилмоқда. Яна бир жиҳатни алоҳида айтиб ўтиш зарур, олимпиада ва футбол мундиал сингари катта форумлар асосан тоқ эмас, балки жуфт йилларда ўтказилади.
Шундай бўлсада, ушбу йилдаги жаҳон ва қитъа миқёсида ўтказиладиган кўплаб турнирлар мухлисларга ҳаяжонли дақиқаларни ҳадя этишиши тайин. Энди, марҳамат қилиб, 2015- йилда кутилаётган спорт анжуманлари билан танишинг.
Футбол бўйича ўтказиладиган Осиё-2015 мусобақаси
Ва ниҳоят, 9- январь куни Австралиянинг Сидней шаҳрида чарм тўп ишқибозлари орзиқиб кутган Осиё биринчилигига старт берилди.
Биз икки турига гувоҳ бўлган бу мусобақа сўнги йиллар давомида мухлислар томонидан ҳақли эътирозларга учраётган Миржалол Қосимов шогирдлари учун катта синов вазифасини ўтаб берса ажаб, эмас. Чунки, бизни олдинда 2018-йили Россияда бўлиб ўтадиган жаҳон чемпионати саралаш баҳслари кутиб турибди. Маълумингизким бу турнирда ғолиб бўлган жамоа Осиё чемпиони номини қўлга киритиб, ФИФАнинг қитъалараро Кубогида қатнашиш имкониятини қўлга киритади. Биз миллий терма жамоамиздан муваффақиятли иштирокни тилаб қоламиз.
Катта теннис бўйича Австралия очиқ чемпионати
Australia Open (Австралия Оупен). 19 январдан - 01 февралгача Мельбурн шаҳрида бўлиб ўтади
Ҳа, “Кенгурулар юрти” йил бошида ўтказиладиган иккита нуфузли турнир мезбонидир. “Катта дубулға” туркуми сарасига кирувчи машҳур мусобақа - теннис бўйича Австралия очиқ чемпионати анъанавий тарзда 1905- йилдан буён Мельбурн шаҳрида ўтказилиб келинади. 2015- йилги турнир ҳисобда 103- мусобақадир.
Биз учун қаҳратон қиш ҳисобланган январь Мельбурнда спорт мусобақаларини ўтказиш учун энг мақбул ойдир. Чунки, январь Австралиядаги энг илиқ давр бўлиб, океан суви ҳам энг юқори даражада исийди. Турнирга ташриф буюрган спортчилар ва ишқибозлар бўш вақтларини пляжлар ва Мельбурн шаҳрининг диққатга сазовор жойларини томоша қилиш билан ўтказишлари мумкин.
Жаҳон миқёсидаги теннис баталиялари планетамизнинг энг зўр теннис ареналаридан бири Рода Лэйвера (Rod Laver Arena) стадионида ўтказилади. Турнирнинг умумий мукофот жамғармаси дунёдаги энг катта миқдордагиси ҳисобланиб, 2014- йили умумий сумма 33,000,000 миллион долларни ташкил этган. Яккалик баҳслари финалида ғолиб чиққан теннисчи 2,65 миллиона доллар эгаси бўлади. Иккинчи ўринни қўлга киритиган атлет эса мана шу сумманинг тенг ярми миқдорида мукофот пулини топади.
Футбол бўйича ёшлар терма жамоалари ўртасида жаҳон чемпионати
Юртимиз футбол ишқибозлари интизорлик билан кутаётган яна бир нуфузли мусобақа 2015 йилнинг 30 майидан 20 июнигача бўлган давр оралиғида Янги Зеландия давлатида бўлиб ўтади. Ўз қитъалари миқёсида финал йўлланмасини қўлга киритган 24 жамоа орасида Равшан Ҳайдаров бошчилигидаги Ўзбекистон ёшлар термаси ҳам бор. Баҳорнинг сўнги кунларида старт берилиши кўзда тутилган мусобақага қуръа феврал ойида ташланади. Кичик мундиал Янги Зеландиянинг еттита шаҳридаги еттита муҳташам “Окленд”, “Крайстчерч”, “Отаго”, “ Вайкато”, “Таранаки”, “Марказий” ҳамда “Эвантс-марказ” стадионларида бўлиб ўтади. Айни пайтда Ўзбекистон ёшлари термаси тайёргарлик ишларига зўр беришган.
Фигурали учиш бўйича жаҳон чемпионати. Шанхай - 2015
Шу пайтгача нафақат Ҳитой балки Осиёнинг ҳеч бир давлати фигурали учиш бўйича жаҳон чемпионатига мезбонлик қилмаган. Шу йилнинг 23 мартидан – 29 мартигача Шанхай шаҳрида ўтказиладиган нуфузли мусобақада дунёнинг энг зўр спортчилари эркаклар ва аёллар яккалик баҳслари, жуфтлик ҳамда музда рақсга тушиш бўйича медаллар жамланмаси кураш олиб борадилар. Мусобақаларда
ISU(конкида шуғулланувчи спортчилар Халқаро Иттифоқи) ташкилоти аъзолари бўлган давлатларнинг 1999 – йилнинг 1 июлигача туғилган спортчилари иштирок этишлари мумкин. Қоидага кўра ҳар бир мамлакат жаҳон чемпионатигача ўтказилган мусобақаларда етарли рейтинг балларини тўплаган 1-3 спортчи(жуфтлик)лари билан қатнаша олади. Турнир Шанхай шаҳрининг кўрки ҳисобланган “Шарқ” спорт аренасида бўлиб ўтади.
Енгил атлетика бўйича жаҳон чемпионати. Пекин – 2015
Ёз ойларида Чин юртида бўладиган яна бир нуфузли турнир енгил атлетика федерациялариннг Халқаро Ассоциацияси шафелигида ўтказилиб, унда турли давлат вакиллари 47та медаллар шодаси учун кураш олиб борадилар. Бу турнирга Ҳитой мамлакати илк бора мезбонлик қилаётган бўлиб, бу даражадаги мусобақа Осиё қитъасида эса тўрт бора ўтказилган. 2010- йилнинг 15 мартида енгил атлетика бош ташкилоти 2015 йилдаги жаҳон чемпионати ўтказиш учун даъвогарлик қилаётган учта Пекин, Лондон ва Хожув шаҳарларини эълон қилган эди. Кейинчалик, иқтисодий муаммолар туфайли Лондон ўз номзодини олган. 2010- йилнинг ноябридаги анжуманда эса мусобақа мезбонлиги Пекин шаҳрига берилган эди.
лк бора ўтказилётган Европа ўйинлари мусобақаси. Баку-2015
Маълумки, бошқа барча қитъалар ўзларининг мана кўринишдаги мусобақаларига эга. 2011- йили Мексикада XVI Панамерика ўйинлари, Қатарда эса XII - Панараб ўйинлари, Мозамбикда X- Бутунафрика ўйинлари, 2010- йилда эса Ҳитойда
XVI- Осиё ўйинлари ўтказилди. 2011- йилнинг апрелида Европа олимипиа қўмитаси президенти
Патрик Хики ўз ичига барча олимпия спорт турларини қамраб оладиган Европа ўйинларини ўтказиш ташаббуси билан чиқди. Хикининг таклифи Ҳалқаро олимпиа қўмитаси томонидан ҳам қўллаб-қувватланиб, кўҳна қитъанинг 49 та миллий олимпиа қўмиталаридан 47таси бу таклифни қабул қилдилар. Хики янгиликка ҳомийлар томонидан жула катта қизиқиш бўлаётганини билдирмоқда. Ўша йилиёқ илк мусобақани 2015-йили ўтказилиши режалаштирилди.
2012-йили Европа олимпиа қўмиталарининг Бош ассамблеяси илк ўйинларга Озарбайжон пойтахти Баку шаҳри мезбонлик қилишини эълон қилди. Европа ўйинларининг очилиш маросими 2015- йилнинг 12-июнига белгиланган бўлиб, мусобақа 28-июнь куни якунига етади.
Мусобақаларда Европанинг 49 мамлакатидан ташриф буюрган атлетлар 19 спорт тури бўйича беллашадилар. Ҳар тўрт йилда ўтказилиши кўзда тутилган турнирнинг навбатдаги 2019 йилги беллашувларига яна 10 спорт тури қўшилиши режалаштирилган.
Ёзги Универсиада - Кореяда, қишгиси эса, Испанияда бўлиб ўтади
XXVII- қишги Универсиада мусобақаларига Испаниянинг Малага ва Гранада ҳамда турнирнинг шимолий спорт турлари Словакиянинг Штрбске Плесо ва Осрблье шаҳарлари мезбонлик қилади. Шу йилнинг 4 – 14 феврал кунлари старт оладиган беллашувларда спортнинг 9 тури бўйича 64та медаллар ўйналади.
Талабаларнинг ёзги Универсиадаси эса Корея республикасининг Кванжу шаҳрида 4 июлда бошланиб, ўн кун давомида қизиқарли баталияларга бой равишда ўтказилади.
Бундан ташқари спорт ихлосмандларини йил давомида футбол бўйича Европа чемпионати саралаш баҳслари, футбол бўйича Ўзбекистон олий Лигаси ўйинлари яна бир қатор мусобақалар кутиб турибди.
Элмурод ЭРМАТОВ, sports.uz
