Эрон терма жамоаси бош мураббийи Карлуш Кейруш Осиё Кубоги чорак финалида Ироққа қарши кечган учрашувдан сўнг фикр билдираркан, нима учун ҳакам Бенжамин Уильямс эронликлар ҳимоячиси Меҳридод Пўлодийни майдондан четлатганини тушунтириб беришини сўради.
"Қизиқ, ҳакам ухлаб қолиши мумкинмиди? Мен ҳакам нима сабабдан Пўлодийни четлатганини тушунтириб бериши учун тиз чўкишга тайёрман. Ҳакам нима сабабдан бундай қарорга келганини тушунтириб беришини сўрайман. Ахир бу қарор бизни уйга қайтишга мажбур қилди.
Ҳакамнинг ишига баҳо беришни истамайман, чунки бундай ҳолатда менинг мураббийлик фаолиятим якунига етади", - дейди Кейруш.
Эслатиб ўтамиз, Осиё Кубоги доирасида кечган Эрон - Ироқ ўйинида 3:3 ҳисоби қайд этилган ва пенальтилар сериясига кўра Ироқ ярим финалга чиққан эди. Шу ўринда таъкидлаб ўтиш лозим, Бенжамин Уильямс Саудия Арабистони - Ўзбекистон ўйинида ҳам араблар фойдасига шубҳали қарорлар қабул қилган ва битта ноўрин пенальти белгилаган эди.
Манба: www.uff.uz
