Аввал хабар қилганимиздек, бугун, 2019 йил 18 декабрь, кучли ёмғир натижасида, Юнусобод метросини кенгайтириш учун қурилиш майдончасининг очиқ қисмида фавқулодда ҳолат (қисман ер кўчиши — қулаш) юз берди. Шундан сўнг ССВ расмий хабар бериб, жабрланганлар йуқлигини маълум қилган эди. Бироқ, кейинчалик аниқланишича, вазият унақа эмас.
“Ўзрепорт” телеканали Юнусободдаги метро қурилиши жойидан тезкор репортаж тайёрлади. Суратга олишга ҳам, мутасаддилар интервью беришига ҳам розилик бўлмаган.
Телеканал суҳбатдоши — Юнусободдаги метро қурилиши ишчисининг сўзларига, унинг укаси ва яна беш киши метро кўчкиси остида қолиб кетган.
"Телефонда гаплашаётгандим. Гаплашиб бўлганимдан кейин бир нарса тутади. Худди кабель ёнгандек. Даҳшатли нарса бўлди. Кейин ўша вақтда бетон кўчди. Кўчгандан кейин укамни қидиришни бошладим. Қарасам, укам билан бирга, бизнинг бригадамиздан яна беш киши кўчки тагида қолиб кетган экан", дейди у.
Тасдиқланмаган маълумотларга кўра, кўчки остида 20 га яқин ишчилар қолиб кетган бўлиши мумкин.
