UzReport ахборот агентлигининг хабарига кўра, 2014 йили Ўзбекистонда 4,4 млн тонна кўмир қазиб олинди ҳамда инвестиция дастурига мувофиқ, ушбу тармоққа йўналтирилган 123 млрд 700 млн сўмлик капитал қўйилмалар ўзлаштирилди, деб ёзади uz24.uz нашри.
Айни пайтда Ўзбекистонда кўмир қазиб олиш билан “Ўзбеккўмир” ОАЖ, “Ўзбекенерго” ДАК, “Шарғункўмир” ОАЖ ва “Апартак” МЧЖ корхоналари шуғулланади. Қазиб олинган кўмирнинг умумий миқдоридан3 млн. 989 минг 586 тоннаси “ЎЗбеккўмир” акциядорлик жамияти ҳиссасига (режада- 4 млн.100 минг тонна), 300 минг 39 тоннаси “Апартак” МЧЖ (режада - 250 минг. тонн), , 107 минг 210 тоннаси эса “Шарғункўмир” акциядорлик жамияти (режада -36 минг. тонна. улушига тўғри келади.
Мамлакатимиз энергетика секторида кўмир улушини кўпайтириш муҳимлиги ҳисобга олинган ҳолда, ҳукуматимиз томонидан “Кўмир саноати тармоғини 2019 йилгача ривожлантириш” Дастури тасдиқланди. Унга биноан янги илғор технологиялар жорий этиш, ишлаб чиқариш жараёнларини такомиллаштириш, мавжуд қувватларни модернизация қилиш, техник ҳамда технологик янгилаш ва кенгайтиришга қаратилган қатор инвестиция лойиҳаларини ҳаётга жорий этиш режалаштирилмоқда. Дастурнинг амалга оширилиши 2019 йилгача кўмир қазиб олиш ҳажмини 8,1 млн.тоннагача ошириш имконини беради.
Кўмир саноатини ривожлантиришнинг бош омили сифатида ички бозорда электр энергияси ишлаб чиқаришда фойдаланиладиган табиий газ ва нефт маҳсулотларининг ўрнини босиш, Ўзбекистон энергетика балансида кўмирнинг улушини кўпайтириш ётади.
Кўмир ёқилғисининг асосий истеъмолчиси электроэнергетика тармоғи бўлиб, унинг улушига кўмир истеъмолининг умумий кўрсаткичидан 85 фоизи тўғри келади. Шунингдек, саноат корхоналари, ижтимоий ва коммунал соҳа ва аҳолида ҳам кўмирга талаб катта.
