Франциялик машхур актёр Роже Анен бугун, 11 февраль куни 89 ёшида ҳаётдан кўз юмди, дея хабар бермоқда ТАСС.
Бу хабарни оммавий ахборот воситаларига актёрнинг оила аъзолари беришган. 2009 йилда юз берган инсультдан сўнг у узоқ вақт даволанган ва айни кунларда ҳам Роже Анен Париждаги Жорж Помпиду касалхонасида шифокорлар назорати остида даволанаётганди. Полиция комиссари ролини қойилмақом ижро этган актёр ана шу касалликдан сзнг ўзини ўнглаб олиши бирмунча қийин кечган.
“Комиссар Наварро” телесериали 1989 йили экранларга чиқиб, 2006 йилга қадар узлуксиз бериб борилган. Айтиш керакки, Наварронинг роли айнан Анен учун маҳсус ёзилган.
Шунингдек, у Ален Делон билан биргаликда “Рокко ва унинг ака-оғалари”, “Мари Шанталь доктор Хага қарши” каби яна қатор ўнлаб фильмларда маҳорат билан ўйнаган. Эслатиб ўтамиз, Роже Анен Франциянинг собиқ президенти Франсуа Миттераннинг қориндоши бўлган.
