2014 йилнинг июль ойида Чироқчи туманининг "Қулбурун" қишлоғидаги хонадонлардан бирида кўтарилган жанжал етти маҳаллага эшитилди...
Шу қишлоқда яшовчи Дилноз Сармонова (марҳума) турмуш ўртоғи билан ажрашди. Унинг уйидан ўзига тегишли нарсаларни олиш ҳақидаги суд қароридан сўнг, шу куннинг ўзидаёқ онаси ва укасини олиб, бу хонадонга келди. Келин уйдаги ўзига тегишли нарсаларни бирин-кетин машинага орта бошлади ва машинадан ўзи билан олиб келган аррани олди-да, ҳовлидаги мевали дарахтларни арралай бошлади. Шу чоққача сукут сақлаб турган ён-атрофидаги "томошабинлар” аёлдан дарахтларни кесмасликни сўрашди. Аёл эса бунга жавобан дарахтларни ўзи экканлигини, шунинг учун кесиб ташлашга ҳаққи борлигини айтиб, ишида давом этди.
Бу пайт Дилнознинг онаси мол-мулк илинжида хона ичини кўздан кечира бошлайди. Ўша ерда турган 3-4 метрли сув шлангини олиб кетмоқчи бўлади. Шу пайтгача жим турган қайнота Элмурза Холлиевнинг сабр-косаси тўлиб, ундан шлангни ташлаб кетишни сўрайди. Дилноз онаси ва қайнотасининг жанжалини эшитиб, ўша томонга югуради. Шлангни қўлига олиб, "Буни отамнинг уйидан олиб келганман", дея қайнотасини ҳақоратлай бошлайди. Қайнота эл-юрт ва маҳалла-кўй олдида ўзини шарманда бўлгандек ҳис этади. Жаҳл билан деворга қадалган пичоқни олади-да, тескари ўгирилганча шлангни тортаётган келинининг орқасига санчади. Дилноз кучли оғриқдан шлангни қўйиб юбориб, ташқарига югуради ва уйига жўнаб кетади.
Кечки пайт ҳовлига ҳуқуқни муҳофаза қилувчи орган ходимлари келиб, келини Дилноз Сармонованинг вафот этганлигини айтишганида, Элмурза Холлиев барча айбни бўйнига олди.
Жиноят ишлари бўйича Қашқадарё вилоят суди томонидан Элмурза Холлиевга нисбатан 15 йил муддатга озодликдан маҳрум қилиш жазоси тайинланди. Бу ҳақда uz24.uz нашри “Ҳуқуқ” газетаси маълумотлари асосида хабар беради.
