“Мароқанд – Қарши” темирйўлининг муҳим учта объекти, “Ангрен – Поп” йўналишини электрлаштириш учун 2015 йилда 400 миллион доллардан ортиқ инвестиция йўналтирилади.
Ушбу маблағнинг 55 фоиздан ортиғи “Ангрен – Поп” темирйўлига йўналтирилади – ушбу объектни 2016 йил июлида фойдаланишга топшириш режалаштирилган.
Kun.uz нашрининг “Ўзбекистон темир йўллари” компаниясига асосланиб хабар беришича, 2020 йилга қадар Ўзбекистонда 1000 километрдан ортиқ темирйўл электрлаштирилади.
Олдиндаги вазифалар қаторида узунлиги 187 километрлик “Жиззах – Янгиер” икки йўлли электрлаштирилган темирйўлни қуриш, биринчи галдаги вазифалар орасида эса узунлиги 344 километр бўлган “Тошкент – Самарқанд” йўналишида юқори тезликдаги поездлар қатновини ташкил этиш, узунлиги 372,5 километр бўлган “Мароқанд – Бухоро” темирйўл участкасини электрлаштириш кабилар турибди.
Шу билан бирга ҳаракатланувчи таркибни янгилаш ҳам кўзда тутилган. “Ўзбекистон темир йўллари” яқин йилларда 15та йўловчи ва 11та юк тепловозларини сотиб олади.
