Ўзбекистон Соғлиқни сақлаш вазирлиги расмий сайти Ўзбекистонда 6 ойлик ва 5 йиллик оралиғидаги ёшли болаларда А витамини берилишининг навбатдаги босқичи ўтказилиши ҳақида хабар қилади.
Бундан кўзланган асосий мақсад юртимизда болалар саломатлигини асраш, уларнинг иммун тизимини ошириш ва А витамини танқислигини камайтиришдир.
Жаҳон соғлиқни сақлаш ташкилотининг маълумотларига кўра, дунёда А витамини танқислигига 275 миллионга яқин инсон учраган. Улардан 140 миллион нафари мактабгача ёшдаги болалардир. Ушбу витамин танқислиги оқибатида улардан 500 минггача нафари кўриш қобилиятини йўқотади, 3 миллионга яқин болалар эса бевақт вафот этади. Айниқса, бу хавфга 5 ёшгача бўлган болалар кўпроқ учрайди. Айни кунда А витаминининг танқислиги кўп давлатларда аҳоли саломатлигининг энг долзарб муаммоларидан бири саналади.
Витамин танқислиги эмлашнинг иммунологик самарадорлигининг камайишига ҳамда эмланган болаларда “бошқариладиган” инфекциялар билан касалланишнинг кўпайишига олиб келади. Бундан ташқари, бу танқислик нафас олиш органлари ва ичак инфекциялари билан касалланиш такрорийлигини оширади, темир танқислигининг пайдо бўлиши ва ривожланишига олиб келади.
1990-2000 йилларда болалар ўртасидаги ўлим даражасининг юқори кўрсаткичлари, инфекциялар билан касалланишнинг юқорилиги, болалар қонида А витамин танқислиги мавжудлигининг аниқланиши Ўзбекистонда Витаминлаштириш ҳафталикларининг ўтказилишига сабаб бўлди. Бу тадбир БМТнинг Болалар жамғармаси (ЮНИСЕФ) кўмагида ўтказилади.
Болаларнинг кўп шамоллаши, уларда ичак касалликларининг тез-тез учраши, ўсишда ортда қолиш, тери қопламаларининг қуришқоқлиги, кўриш қобилиятининг пасайиши ҳамда кўз оқида доғларнинг пайдо бўлиши организмда А витаминининг танқислигидан дарак беради.
Витаминлаштириш яшаш жойи бўйича барча тиббиёт муассасаларида ҳамда витаминлаштириш пунктларида амалга оширилади. Витаминлаштиришнинг бошланиши ҳақида яшаш жойи бўйича поликлиникаларда маълум қилинади.
