18 май куни Туркиянинг Истанбул шаҳрида Ўзбекистонда хизмат кўрсатган артист Райҳон Ғаниеванинг концерт дастури бўлиб ўтганидан хабарингиз бор.
Хонанданинг мазкур концерт дастурида кийган либоси бугун интернет олами муҳокама майдонининг асосий мавзусига айланиб қолди. Ўзбекистонда хизмат кўрсатган артист Гулбаҳор Эрқулова www.facebook.com ижтимоий тармоғи орқали Райҳоннинг кийган либосига қатъий эътироз билдирди.
Яқиндагина Райҳоннинг Лола билан куйлаган дуэтига ишланган видеоклипи жуда катта танқидларга сабаб бўлиб, ҳатто ТВ эфирларидан олиб ташланган эди. Куни кеча Ўзбекистон хотин-қизлар кўмитаси томонидан ташкил этилган катта йиғилишда ҳам, “Ўзбекнаво” эстрада бирламаси томонидан ўтказилган анжуманда ҳам Райҳон ва Лоланинг маданияти, жамоатчилик қаршисидаги одобии таҳлил этилган эди.
Туркияда Ўзбекистон номидан концерт бераётган хонанда наҳот ўз юрти, ватандошлари шаънини ўйламаган бўлса? Аксарият санъаткорларимиз ғарбга тақлид қиламан деб, азалий қадриятларимиз, миллий урф одатларимиз, шарқ халқларига хос андишаю юксак одоб-ахлоқ қоидаларини унутишаётгани атрофдагиларга нисбатан беписандликдан бошқа нарса эмас.
Санъаткорлар бу йўл билан ёшларга қандай намуна бўлишяпти? Зотан мамлакатимиз раҳбари ўзининг “Юксак маънавият – енгилмас куч” асарида санъаткор маънавияти, унинг саҳна маданияти масаласига алоҳида эътибор қаратиб, “...бугунги кунда мусиқа санъати навқирон авлодимизнинг юксак маънавият руҳида камол топишида бошқа санъат турларига қараганда кўпроқ ва кучлироқ таъсир кўрсатмоқда” деб ёзади. Хонандалар концерт дастурларию клипларидаги бундай чиқишлари орқали ёшлар маънавиятининг юксалишига қанчалик хизмат қилишяпти экан?
Санъаткор одоби масаласида жиддийроқ бош қотириш вақти келганга ўхшайди.
Қамариддин Шайхов
