Қанчадан қанча етук актёрларни етиштирган, уларни халққа севимли қилган маскан — Ўзбек Миллий академик драма театри бир асрлик “умр”ини яшаб, иккинчи асрга қадам босди. Шу муносабат билан мазкур театр жамоаси 101-мавсум очилишини катта тантана қилди…
Шу куни отахон театр эшикларини катта очиб, маънавий озуқа олиш истагида бўлган томошабинларни мусиқа садолари остида кутиб олди. Остона ҳатлаб ичкарига одимлар экансиз, янгитдан безатилган зал кўзингизни қувнатади. Деворга осилган расмларга разм солган ёши катта мухлислар, беихтиёр ёшлигини ёдга соладиган севимли актёрларини хотирлайди. Ёш томошабинлар учун эса театр тарихини ўрганиш учун қулай имконият. Ахир улар шунчаки сурат эмас, балки театрга тамал тошини қўйган, саҳнанинг чангини ютиб, ролига юрагининг бир парчасини жо қилган афсонлардан сўзлайди.
Бежиз “театр — тирик “организм”, дейишмайди. У ерда сохталик, ёлғон йўқ. Шу маънода ибратхонага ташриф буюрганлар ёш ва аллақачон тирик афсонага айланишга улгурган театр жамоаси билан яқиндан мулоқотда бўлди, расмга тушишди, диллашишди. Бундай имкониятдан мухлислар унумли фойдаланишнинг уддасидан чиқишди.
Ташриф буюрганлар томоша залидан қўним топишгач, “Театр бу...” номли қўшиқ садоси остида театрнинг 101 йиллик тарихидан дарак берувчи видео намойиш этилди. Сўнг саҳнага элтувчи иккита йўлакдан театр актёрлари бирин-кетин саҳна томон йўналишди. Ўзбек Миллий академик драма театрининг жамоаси номидан сўзга чиққан Ўзбекистонда хизмат кўрсатган артист Фатҳулла Масъудов мавсумни очиқ дея эълон қилди.
101-мавсумни Абдулла Қодирийнинг “Ўткан кунлар” асари асосида Эркин Хушвақтов инцинировкаси билан Марат Азимов саҳналаштирган спектакль очиб берди..
“Замон қаҳрамонларини гавдалантирамиз!”
Эркин КОМИЛОВ, Ўзбекистон халқ артисти: — 101 йил — айтишга осон. Лекин мана шу йиллар ўз ичига неча-неча буюк актёрлар бедор ўтказган тунларнинг, машаққатли кунларнинг заҳматини қамраб олган. Мукофот сифатида эса миллионлаб мухлисларнинг тили ва дилидан жой олишган.
Сира ёдимдан чиқмайди, муҳтарам Президентимиз Бухоро театрининг очилишида “Замон қаҳрамонларини кўрайлик!” дегандилар. Шу масканда ижод қилиб ўтган устозларимиз, томошабинлар олдида катта қарзимиз борлигини яхши англаймиз.
Тиббиёт, фан, адабиёт, саноат, қишлоқ хўжалиги - умуман барча жабҳаларда замон қаҳрамони бор. Уларнинг сиймосини яратиш ҳам қарз, ҳам фарзимиз. Мавсум очилиши айёмида биз актёрлар замон қаҳрамонларини саҳнада гавдалантиришга сўз берамиз. Истагимиз, томошабинларимиз театримизга тез-тез ташриф буюришсин.
Садоқат АЛЛАБЕРГАНОВА тайёрлади.
