Ўзбeкистон делегациясининг Хитойнинг Ченду шаҳрида бўлиб ўтган Шанхай ҳамкорлик ташкилотига аъзо давлатларнинг йиғилишида иштирок этгани ҳақида маълумот берган эдик.
Унда Орол денгизининг қуриб бориши ва бунинг оқибатида юзага келаётган муаммолар таъкидланди. Бир авлод ҳаёти давомида бутунлай йўқолиш ёқасига келиб қолган Орол фожиаси бугун ҳам халқаро ҳамжамият эътибори марказида қолмоқда. Бугунги кунга келиб сув сатҳи Мўйноқ портидан 150 километрга чекинди.
Денгизнинг қуриб бориши нафақат Марказий Осиё, балки бошқа минтақаларда ҳам сезилаётган кескин иқлим ўзгаришига олиб келди. Оролнинг қуриган қисмида 5,5 миллион гектарга тенг ҳудудда янги тузли чўл пайдо бўлган. Бу ҳудудларда йилига 90 кундан ортиқ давр мобайнида чанг бўронлари содир бўлади ва 100 миллион тоннадан ортиқ чанг ва заҳарли тузларни атмосферага кўтариб минглаб километрларга ёймоқда.
Таъкидлаб ўтилганидек, “вужудга келган кенг кўламли ноҳуш экологик вазият нафақат Ўзбекистон ва Марказий Осиё давлатларига, балки бутун жаҳонга салбий таъсир кўрсатмоқда”.
