Иқтисодиётимизнинг муҳим таянчига айланиб бораётган тадбиркорларнинг эркин фаолият юритиши учун барча зарур шарт-шароит таъминлаб берилмоқда. Айниқса, соҳа вакиллари фаолиятини текшириш тизими тубдан такомиллашмоқда.
Фармонга мувофиқ текширишлар ўтказиш тартиби, режали текширишлар даврийлиги, текшириш ўтказиш муддати тубдан такомиллашди. Текширишлар ўтказиш муддатини камайтириш ва такрорий текширувларнинг олдини олиш мақсадида уларнинг даврийлиги бирхиллаштирилди. Натижада тадбиркорлик субъектларида ўтказилаётган текширишлар янада қисқарди.
Бугун текширишларнинг камайгани тадбиркорларнинг вақтини беҳуда олиш, кайфиятига салбий таъсир кўрсатиш каби ҳолатларга барҳам бериб, уларнинг самарали фаолият юритиши учун янада кенг имкониятлар яратаётир, – дейди Ўзбекистон Республикаси Давлат солиқ қўмитаси бошқарма бошлиғи, Назорат қилувчи органлар фаолиятини мувофиқлаштирувчи республика кенгаши котиби Эркин Жўраев.
Текширувларни назоратига олувчи ишчи гуруҳ ташкил этилганига 5 ойдан кўпроқ вақт ўтди. Шу даврда ноқонуний текшириш ўтказган назорат органларининг 49 ходими жавобгарликка тортилди.
