Hilton Worldwide корпорациясига тегишли бўлган йирик меҳмонхоналар тармоғи хакерлар ҳужумига учради, деб хабар бермоқда “ТАСС”.

Компания матбуот хизматининг хабар беришича, хакерларнинг мақсади мижозлар картаси маълумотларини қўлга киритиш бўлган.   

"Hilton Worldwide айрим савдо пунктларидаги карталар бўйича тўлов ҳақидаги маълумотларни олишга қаратилган зарарли дастурларни бартараф этиш бўйича чора-тадбирларни амалга оширди”- дейилади хабарда.

Шунингдек, меҳмонхона маъмурияти 2014 йилнинг 18 ноябридан 5 декабригача, 2015 йилнинг 21 апрелидан 27 июлигача бўлган давр оралиғида мехмонхона хизматлари учун тўловни амалга оширган мижозлардан тўлов чекларини қайта текшириб кўришни сўради.

Hilton Worldwide таркибида  мингдан ортиқ меҳмонхоналар киради.