Ijtimoiy tarmoqlarda “Sirdaryo viloyati Yangier shahar tez tibbiy yordam haydovchilari murojaat yo`llashdi. Ular ajratilgan tez tibbiy yordam mashina "chirib" ketgani, bir nechta tashkilotga murojaat qilsada masala ijobiy hal bo`lmayotganini aytadi” deb nomlangan videomurojaat tarqaldi. Bu ko`pchilik tarmoq foydalanuvchilarining muhokamasiga sabab bo`ldi. Ushbu videomurojaat yuzasidan Sirdaryo viloyati hokimligi Axborot xizmati quyidagicha munosabat bildirdi.
"Bugungi kunda Sirdaryo viloyat sog`liqni saqlash boshqarmasi Avtoxo`jaligida jami 144 dona avtotransport vositasi mavjud bo`lib, shundan 88 tasi tez tibbiy yordam avtomashinalarini tashkil qiladi. Bularning tarkibida to`liq tibbiy jihozlar bilan jihozlangan so`nggi rusumdagi 3 ta “Nissan", 8 ta “Xunday", 2 ta "Toyota" jami 13 ta reanimasion avtomobillar ham xizmat ko`rsatmoqda.
O`zbekiston Respublikasi Prezidenti tomonidan o`tkazilgan videoselektor yig`ilishida pandemiya davrida aholining tez tibbiy yordamga bo`lgan murojaatlari sonining oshib borayotganligi sababli, tez tibbiy yordam avtomashinalari chaqiriqlarga ulgurmayotganligi, aholining koronavirusga chalingan qismiga o`z vaqtida tibbiy xizmat ko`rsatishini e`tiborga olib qo`shimcha tez tibbiy yordam avtomashinalari ajratilish to`g`risida topshiriq bergan edi. Ushbu topshiriqdan kelib chiqib, viloyat hokimligi tomonidan mahalliy byudjet hisobidan 14 dona tez tibbiy yordam avtomashinasi xarid qilindi. Shuningdek, xomiylik mablag`lari xisobidan, qo`shimcha 3 dona tez tibbiy yordam avtomashinalari xayriya qilingan. Hozirgi kunda ushbu tez tibbiy yordam avtomashinalari tuman va shahar tez tibbiy yordam bo`limlarida xizmat ko`rsatish uchun yuborilgan.
Shu jumladan, Yangier shahar tez tibbiy yordam bo`limiga 1 ta yangi “Damas” rusumli qo`shimcha tez tibbiy yordam avtomashinasi yuborilgan.
Hozirda, Yangier shahrida 4 ta tez tibbiy yordam avtomashinalari 43 700 aholiga xizmat ko`rsatmoqda.
Joriy yilning 5 avgust sanasida ijtimoiy tarmoqlarda tarqalgan, Yangier shahar tez tibbiy yordam haydovchilari tomonidan yo`llangan murojaatda, tez tibbiy yordam mashinasi "chirib" ketgani, bir nechta tashkilotga murojaat qilsada masala ijobiy hal bo`lmayotgaligi ta`kidlab o`tilgan. Murojaat yuzasidan Yangier shahar tez tibbiy yordam bo`limiga qarashli davlat raqamli 20 973 SAA bo`lgan “Damas” rusumli, tez tibbiy yordam avtomashinasi o`rganilganda haqiqatdan ham ushbu avtomashina 2006 yilda ishlab chiqarilgan bo`lib, O`zbekiston Respublikasi Prezidentining 2017 yil 17 martdagi PQ-2838-sonli qaroriga asosan Yangier shahar tibbiyot birlashmasidan avtoxo`jalik balansiga olinganligi aniqlandi. Shuningdek, avtomashina 2020 yil aprel oyida IIB Yo`l harakati xavfsizligi bo`limi tomonidan yillik majburiy texnik ko`rikdan o`tkazilgan bo`lib, texnik soz deb topilgan.
Sirdaryo viloyat sog`liqni saqlash boshqarmasi Avtoxo`jaligi rahbarining so`zlariga ko`ra, ayni pandemiya sharoitidan kelib chiqib, avtomashina texnik soz deb topilganligini inobatga olgan holda vaqtincha foydalanib turilgan.
Bundan tashqari avtomashina ta`miri uchun joriy yilning aprel oyida 167000 so`mlik, may oyida 1565200 so`mlik ehtiyot qismlari yuk xati asosida berilib, ta`mirlangan.
Qolaversa, murojaatda ta`kidlangan “oylik olmayapmiz, ta`minlash xarajatlarini yonimizdan to`layapmiz...” degan vajlar o`rganish natijasida avtomashina haydovchilari favqulodda ta`mirlash uchun qilgan xarajatlari hisob-kitob qilinib, avtoxo`jalik tomonidan to`liq to`lab berilgan.
Bugungi pandemiya sharoiti, sinovli kunlarda aholini rozi qilish, koronavirus infeksiyasining tarqalishiga yo`l qo`ymaslik, bu baloni minimal talofat bilan engib o`tish, mavjud imkoniyatlardan to`liq foydalanish maqsadga muvofiq hisoblanadi. Ko`pni ko`rgan mard va matonatli xalqimiz el boshiga tashvish tushganda, avvalo, sabr bilan birdamlik va jipslikda harakat qilishiga ishonamiz. Shundagina bu ko`rgiliklarni yorug` yuz bilan qisqa muddatda engib o`tamiz", deyiladi hokimlik izohida.
