Avval xabar qilganimizdek, Prezident Shavkat Mirziyoev 6 avgust kuni joriy yilda oliy ta`lim muassasalariga qabulni tashkil qilish va 2020-2021-o`quv yiliga tayyorgarlik ko`rish masalalari yuzasidan yig`ilish o`tkazdi.
Yig`ilishda test sinovlarini abiturientlar va nazoratchilar uchun epidemiologik xavfsizlikni ta`minlash imkonini beradigan joyda o`tkazish kerakligi qayd etildi.
Test sinovlarini Toshkent va Nukus shaharlari, viloyatlar markazlaridagi stadionlarda tashkil etishga topshiriq berildi.
Test sinovlari kuniga 2 marta (havo salqin paytda) o`tkazilib, taxminan 12-14 kunda yakunlash mumkinligi qayd etildi.
Mutasaddi vazirlik va idoralarga stadionlarni test sinovlariga puxta tayyorlash, ularning dislokasiyasi bo`yicha abiturientlarni to`liq xabardor qilish yuzasidan ko`rsatmalar berildi.
Davlatimiz rahbari imtihonlarning sanasini Sog`liqni saqlash vazirligi va Sanitariya-epidemiologiya xizmatining epidemiologik vaziyat borasidagi xulosasidan kelib chiqqan holda belgilash, aholi salomatligiga xavfsizligini ta`minlash lozimligini ta`kidladi.
Test sinovlarini shaffof holda o`tkazish uchun, yoshlarni ortiqcha sarson qilmaslik maqsadida Ta`lim muassasalariga o`qishga qabul qilish bo`yicha Davlat komissiyasi, hokimliklar, Ichki ishlar vazirligi, Milliy gvardiya, Jismoniy tarbiya va sport vazirligi, Davlat xavfsizligi xizmati tomonidan zarur choralar ko`rilishi belgilandi, deyiladi DTM xabarida.
Mavzuga doir:
Oliy ta`limda yangi o`quv yili masofaviy tarzda boshlanadi
Endi talabalar uchun arzon internet trafiklari joriy etiladi