Joriy yilning 11 avgust kuni Adliya vazirligi tomonidan siyosiy-huquqiy sohalardagi xalqaro reyting va indekslar bilan ishlash borasida Oliy Majlis palatalarining qo`mitalari vakillari hamda mahalliy davlat hokimiyati organlari mas`ul xodimlari uchun “Boshqaruv sifati indikatorlari”, “Korrupsiyani qabul qilish indeksi” hamda “Huquq ustuvorligi indeksi” mavzularida trening mashg`ulotlari o`tkazildi.Bu haqda Adliya vazirligi Jamoatchilik bilan aloqalar bo`limi xabar bermoqda.
Mazkur trening mashg`ulotlari O`zbekiston Respublikasi Prezidentining 2020 yil 2 iyundagi “O`zbekiston Respublikasining xalqaro reyting va indekslardagi o`rnini yaxshilash hamda davlat organlari va tashkilotlarida ular bilan tizimli ishlashning yangi mexanizmini joriy qilish to`g`risida”gi Farmoni bilan tuzilgan Xalqaro reyting va indekslar bilan ishlash bo`yicha respublika kengashi faoliyati doirasida tashkillashtirildi.
Trening mashg`uloti doirasida yuqorida ko`rsatib o`tilgan xalqaro indekslarining mazmun-mohiyati, maqsadi va o`ziga xos ahamiyatli jihatlari haqida hamda ularni tuzuvchi tashkilotlar to`g`risida ma`lumotlar taqdim etildi.
Shu bilan birga, mazkur indekslarda mamlakatimizning joriy o`rni va ushbu o`rinlarni yanada oshirish uchun qilinishi zarur bo`lgan ishlar, shuningdek mazkur sohada yo`l qo`yilayotgan muammoli masalalar va kamchiliklarga to`xtalib o`tildi.
