Uzbekistan Airways bosqichma-bosqich aviaqatnovlarni tiklamoqda, shu munosabat bilan aviakompaniya parvoz vaqtida amal qiladigan cheklovlarni ma`lum qildi:
"COVID-19 tarqalishining oldini olish maqsadida havo kemasi sahnida ko`rsatiladigan servis xizmatlariga ba`zi bir o`zgarishlarni kiritishga majburmiz. Agar ilgari ko`rsatilgan xizmatlardan birortasi ko`rsatilmayotgan bo`lsa, buning uchun uzr so`raymiz. Biz uchun muhimi – yo`lovchilarimiz va ekipajimiz salomatligi.
Barcha ekipaj a`zolari parvozdan oldin majburiy tibbiy tekshiruvlar va harorat o`lchovlaridan o`tadilar. Butun parvoz davomida ular ham, barcha yo`lovchilar singari niqob taqib, himoya qo`lqoplarini kiyishadi.
Har bir reysdan so`ng samolyot maxsus vositalar bilan yaxshilab tozalanadi, barcha yuzalar va ashyolarga ishlov beriladi. Dezinfeksiya havo kemasi sahnida ham, bagaj bo`linmalarida ham amalga oshiriladi.
Samolyotning yo`lovchi bo`linmasidagi havo yuqoridan pastga qarab aylanib yuradi, bu esa boshqa qatordagi yo`lovchilardan biri aksirgan holda mikrotomchilarning boshqa yo`lovchilarning nafas yo`llariga tushishini istisno qiladi, niqoblardan foydalanish esa mikroqismlar tarqalishining oldini oladi. Uzbekistan Airways aviakompaniyasi samolyotlari virus va bakteriyalarning 99,97% ga yaqinini ushlab qoluvchi zamonaviy NERA-filtrlari bilan jihozlangan.
Suv, quloqchinlar, oziq-ovqat, shuningdek biznes klass uchun yo`l va bolalar to`plamlari alohida o`ramlarda beriladi. Kosher taomlaridan tashqari boshqa maxsus taomlarga oldindan buyurtma berish mumkin.
Bort jurnallari va matbuot nashrlari vaqtincha bo`lmaydi.
Umid qilamizki, kiritilgan cheklovlar sizning parvozdan oladigan taassurotlaringizga ta`sir ko`rsatmaydi. Epidemiologik vaziyat yaxshilanishi bilan, to`liq servis xizmatlarini ko`rsatishga qaytamiz.
Koronavirus pandemiyasi vaqtida o`z xavfsizligingiz va yaqinlaringizning xavfsizligini ta`minlash uchun samolyot sahnida amal qilinishi lozim bo`lgan qoida va tavsiyalar bilan tanishib chiqishingizni so`raymiz:
- butun parvoz davomida yo`lovchilar og`iz va burunni yopib turuvchi niqoblarni taqishlari shart (2 yoshgacha bo`lgan bolalardan tashqari);
- qo`l yuki sifatida siz ayollar sumkasi, portfel, noutbuk, agar bolalar bilan sayohat qilayotgan bo`lsangiz, bolalar uchun kerak bo`ladigan ashyolar solingan sumkani olishingiz mumkin. Boshqa barcha narsalar qatnovga ro`yxatdan o`tilayotgan vaqtda bagajga topshirilishi shart;
- havo kemasiga chiqarish ijtimoiy masofa saqlagan holda amalga oshiriladi;
- agar yo`lovchi parvoz paytida o`zini yomon his qilsa (isitma, yo`tal, tumov va boshqalar), zudlik bilan bortkuzatuvchini chaqirish tugmasini bosishi kerak. Ekipaj kasallik belgilari bo`lgan yo`lovchiga qanday munosabatda bo`lishga o`rgatilgan;
- parvoz paytida havo kemasi sahnida harakatlanishdan tiyilish tavsiya etiladi. Hojatxonaga tashrif buyurish uchun, uning bo`shligiga ishonch hosil qilish maqsadida yorug`lik tablosiga e`tibor qarating, hojatxona oldida navbat hosil bo`lishiga yo`l qo`ymang.
- samolyot erga qo`nganidan so`ng, iltimos, ekipajning ko`rsatmasiga qadar o`rningizdan turmang. Havo kemasidan tushish ham, xuddi unga chiqqandek, ijtimoiy masofaga amal qilgan holda amalga oshiriladi", - deyiladi kompaniya xabarida.
