Bugun AOKAda Koronavirusga qarshi kurash shtabi a`zosi Sevara Ubaydullaeva ishtirokida brifing o`tkazildi. Brifingda aholidan kelgan murojaat va savollarga javob qaytarildi.
Savol: Koronavirusning engil darajasida dori vositalarisiz organizm kasallikni o`zi engishi mumkinmi?
– Ha, shunday ham bo`lishi mumkin. Aniq ma`lumotlarga ko`ra, kontaktda bo`lgan aholining 80 foizida kasallik simptomlarsiz, ya`ni engil darajada o`tadi. Mazkur bemorlarda immun tizim yaxshi rivojlangan bo`ladi.
Bunday bemorlar kasallikni antibiotiklar va boshka kuchli dori vositalarisiz engishlari mumkin. Bu holatlarda shifokorlar tavsiyasi va nazoratida immun tizimni qo`llab turish, shaxsiy gigiena qoidalari hamda karantin talablariga rioya qilish o`ta muhim hisoblanadi. Shuningdek,
▫️tomoqni tez-tez turli eritmalarda chayib turish, kuniga kamida 8 marta ;
▫️kun davomida 3-4 litrdan ortiq suyuqlik ichish;
▫️sog`lom ovqatlanish, ovqat rasionida meva va sabzavotlarning bo`lishi;
▫️ S vitaminiga boy mahsulotlar: limon, na`matak, malina choylarni ichish, bolg`or qalampiri, piyoz va ko`katlar iste`mol qilish;
▫️shu bilan birga, tez-tez nafas gimnastikalari, engil yurish va mashqlarni bajarib turish tavsiya etiladi.
