Bugun O`zbekiston Respublikasi Bosh prokurorining birinchi o`rinbosari A.Xolmaxmatov raisligida “Respublikada jinoyatchilikning oldini olish va unga qarshi kurashish samaradorligini oshirish”ga bag`ishlangan tezkor yig`ilish bo`lib o`tdi.
Onlayn tarzda o`tkazilgan yig`ilishda Ichki ishlar vazirining birinchi o`rinbosari Sh.Sobirov, Mahalla va oilani qo`llab-quvvatlash vazirining birinchi o`rinbosari G.Murufova, tegishli boshqarmalar boshliqlari hamda viloyatlar va ularga tenglashtirilgan prokurorlarning soha bo`yicha o`rinbosarlari, tuman (shahar) prokurorlari va ichki ishlar bo`limlari boshliqlari, Mahalla va oilani qo`llab-quvvatlash boshqarmalari boshliqlari ishtirok etdi.
Yig`ilishda Bosh prokurorning birinchi o`rinbosari A.Xolmaxmatov ma`ruza qilib, hozirgi kunning dolzarb va og`riqli, davlatimiz rahbari va xalqimizning asosli noroziligiga sabab bo`layotgan muammo – huquqni muhofaza qiluvchi idoralar hodimlari tomonidan fuqarolarga tazyiq o`tkazish, urish – do`pposlash, qiynoqqa solish va boshqa shafqatsiz, g`ayriinsoniy yoki qadr – qimmatni kamsituvchi harakatlar sodir etilishiga chek qo`yilmayotganligiga alohida to`xtaldi.
Chiroqchi tumani va Andijon shahrida ichki ishlar xodimlari tomonidan fuqarolar urib, kaltaklanib, qiynoqqa solinishi oqibatida vafot etganligi “ichki ishlar organlari”ning, qolaversa butun huquqni muhofaza qiluvchi idoralarning nomiga ketmas dog` tushushiga sababchi bo`layotganligi ta`kidlandi.
Shuningdek, yig`ilishda jinoyatlarni ro`yxatga olish, jinoyatlarni fosh etish va tezkor qidiruv tadbirlarini o`z vaqtida va to`laqonli olib borilishi, huquqbuzarliklarni barvaqt oldini olish, bu borada prokuror nazoratiga tanqidiy munosabat bildirildi.
Yig`ilishda yoshlar va ayollar jinoyatchiligi haqida so`z yuritilib, mahalla va oilalarda o`zaro totuvlikni ta`minlash, nizo va ziddiyatlarni bartaraf etilishi samarasizligi huquqbuzarliklarning kelib chiqishiga omil bo`lib xizmat qilayotganligi ta`kidlandi.
Shuningdek, yig`ilishda Ichki ishlar vazirining birinchi o`rinbosari Sh.Sobirov hamda Mahalla va oilani qo`llab-quvvatlash vazirining birinchi o`rinbosari G.Murufovalarning axborotlari tinglandi.
Faoliyatda yo`l qo`yilgan kamchiliklar yuzasidan hududiy rahbar va mas`ul xodimlarning izoh va tushuntirishlari eshitildi.
Yig`ilish yakunida bu boradagi kelgusida amalga oshiriladigan ishlar yuzasidan tegishli tavsiyalar berildi va chora-tadbirlar ishlab chiqildi.
