Joriy yilning 24 sentyabr kuni Samarqand viloyatining Oqdaryo tumanidan o`tuvchi M-37 avtomobil yo`lining 6-kilometrida xizmat olib borayotgan YPX inspektori “Samarqand-Toshkent” yo`nalishi bo`ylab harakatlanib kelayotgan “Kaptiva” rusumli transport vositasini to`xtatib tekshirgan vaqtida, Toshkent shahrida yashovchi, 1986 yilda tug`ilgan, haydovchi M.M. avtomobilni ishonchnomasiz boshqarib kelayotganligini aniqlagan. Bu haqda YHXBB xabar bermoqda.
Haydovchi M.M.ga nisbatan belgilangan tartibda ma`muriy bayonnoma rasmiylashtirib, transport vositasini vaqtincha saqlash uchun jarima maydonchasiga joylashtirgan.
Ushbu vaqtda haydovchi YPX inspektoriga avtomobilini jarima maydonchasidan chiqarib berish evaziga pora tariqasida 2.000.000 (ikki million) so`m miqdoridagi pullarni taklif qilgan.
YPX inspektori ushbu holat yuzasidan bildirgi orqali viloyat IIB boshlig`i nomiga murojaat qilgan.
Xodimning bildirgisi asosida huquqni muhofoza qiluvchi organ xodimlari tomonidan tezkor tadbir o`tkazilib, haydovchi M.M. avtoturargoh qorovulxonasida YPX inspektoriga 2.000.000 (ikki million) so`m miqdoridagi pullarni pora tariqasida bergan vaqtida daliliy ashyolar bilan ushlangan.
Hozirda holat yuzasidan tergovga qadar tekshiruv harakatlari olib borilmoqda.
