Ijtimoiy tarmoqlarda Jizzaxda koronavirusga chalinib davolanayotgan fuqaro Q.Abdusattarovning Sog`liqni saqlash vaziri Alisher Shodmonovga murojaati videosi tarqaldi.
Unga ko`ra, Q.Abdusattarov Jizzax viloyatidagi koronavirusga chalingan bemorlarni davolash markazida davolanayotganligi, koronavirusga chalinganlar uchun davlat tomonidan 32 mln. so`m pullar ajratilayotgan bo`lsa-da, bemorlar dorilarni shaxsiy mablag`lari hisobidan sotib olayotganliklari, bemorlarga tushlik ovqati berilmayotgani, muassasadagi bo`sh o`rinlarga bemorlar sun`iy ravishda qabul qilinmayotganligi aytilgan.
Ayni paytda mazkur videomurojaat Bosh prokuratura tomonidan ko`rib chiqildi, deya xabar bermoqda Bosh prokuratura Matbuot xizmati.
Mazkur murojaatda bayon qilingan holatlar yuzasidan Jizzax viloyat prokuraturasi tomonidan o`rganish ishlari boshlandi. Natijasi haqida qo`shimcha ravishda xabar beriladi, deyilmoqda rasmiy bayonotda.