Toshkent shahar hokimining 16.04.2018 yilgi “Building and Supplies” MChJga er uchastkasini ajratib berish haqida”gi 608-sonli qarori bilan Yakkasaroy tumani, “Yunus Rajabiy” MFYning 72, 66/4, 66/2 va 66/1-uylari oralig`ida ko`p qavatli turar-joy qurish uchun 0,50 ga er maydoni ajratib berilgan.
Fuqaro O.Pyanovskaya va boshqalar Toshkent shahar hokimining 16.04.2018 yilgi “Building and Supplies” MChJga er uchastkasini ajratib berish haqida”gi 608-sonli qarorini haqiqiy emas deb topish haqida sudga ariza bilan murojaat qilgan.
Chilonzor tuman ma`muriy sudining 11.12.2019 yilgi hal qiluv qarori bilan arizachilarning Toshkent shahar hokimining qarorini haqiqiy emas deb topish haqidagi shikoyatini qanoatlantirish rad etilgan.
Toshkent shahar ma`muriy sudi apellyasiya instansiyasining 27.01.2020 yildagi qarori bilan Chilonzor tuman ma`muriy sudining yuqoridagi hal qiluv qarori o`zgarishsiz qoldirilgan.
Quyidagilarga ko`ra, birinchi va apellyasiya instansiya sudi qarorlari qonunga zid:
BIRINChIDAN O`zbekiston Respublikasi Vazirlar Mahkamasining 03.07.2018 yilga qadar amalda bo`lgan “Toshkent shahrida shaharsozlik normalari va qoidalariga muvofiq Toshkent shahrida er uchastkalari berish amaliyotini o`rganish bo`yicha komissiya tomonidan qarorlar qabul qilish tartibi to`g`risidagi nizomni tasdiqlash to`g`risida”gi 31.12.2008 yilgi
292-sonli qarorining 10-bandiga ko`ra, Toshkent shahar hokimiyati tomonidan er uchastkalarni ajratish bo`yicha Vazirlar Mahkamasi huzurida tashkil etilgan komissiyasining qarori qabul qilishi uchun bir qator hujjatlar, ya`ni er uchastkasining o`rnatilgan tartibda Toshkent shahar bosh arxitektori, er resurslari va davlat kadastri, yong`in xavfsizligi, sanitariya-epidemiologiya nazorati xizmati, ekologiya va atrof muhitni muhofaza qilish va yo`l harakati xavfsizligi boshqarmalari bilan kelishilgan tavsifnomasi, “ToshkentboshplanLITI” DUKning tanlangan er uchastkasi bo`yicha xulosasini taqdim qilishini hamda 14-bandiga ko`ra komissiyaning er uchastkalarini ajratish haqidagi ijobiy qaroriga asosan Toshkent shahar hokimi bir hafta muddatda qonunchilikda o`rnatilgan tartibda qaror qabul qilishi, komissiyaning qarorisiz Toshkent shahar hokimiyatiga er uchastkalarni ajratish taqiqlanishi belgilangan.
Sud tomonidan ushbu normativ-huquqiy hujjatda belgilangan talablar e`tiborga olinmagan.
IKKINChIDAN, “Building and Supplies” MChJning 09.02.2018 yilgi 1/74-sonli murojaati va shahar hokimining 10.02.2018 yildagi 2182/03-sonli ko`rsatmasiga asosan, jamiyatga Yakkasaroy tumani, Yunus Rajabiy mahallasi 72, 55/4, 66/2, 66/1-uylar oralig`ida ko`p qavatli turar-joy binolarini qurish uchun tegishli hujjatlar rasmiylashtirilib, tashkilotlarga kelishish uchun yuborilgan.
“ToshkentboshplanLITI” DUK tomonidan rad javobi berilgan bo`lsa, er tuzish va ko`chmas mulk kadastri xizmatining xulosasi olinmagan.
O`zbekiston Respublikasi Vazirlar Mahkamasining 01.07.2018 yilga qadar amalda bo`lgan 25.02.2013 yildagi 54-sonli qarori bilan tasdiqlangan “Shaharsozlik faoliyatini amalga oshirish uchun aholi punktlarida er uchastkalari berish, qurilish ob`ektlarini loyihalashtirish va ro`yxatdan o`tkazish, shuningdek, ob`ektlarni foydalanishga qabul qilish tartibi to`g`risida”gi Nizomning 14-bandiga asosan, er uchastkasini joylashtirish planida, tuman (shahar) hokimi, tuman (shahar) er resurslari va davlat kadastri bo`limi, tegishli ravishda Qoraqalpog`iston Respublikasi Ekologiya va atrof muhitni muhofaza qilish qo`mitasiga, shuningdek, viloyatlar va Toshkent shahar ekologiya va atrof muhitni muhofaza qilish boshqarmalariga, tuman (shahar) sanitariya-epidemiologiya xizmati, davlat yong`in nazorati hududiy organi, madaniy meros yodgorliklarini qo`riqlash zonasida ob`ekt qurish uchun er uchastkasi tanlashda-madaniy meros ob`ektlarini qo`riqlash va ulardan foydalanish hududiy inspeksiyasi va boshqa tegishli tashkilotlar bilan kelishilishi ko`rsatilgan bo`lsada, vakolatli organlar bilan kelishilmagan va to`plangan hujjatlar Vazirlar Mahkamasining Toshkent shahrida er uchastkalari berish amaliyotini o`rganish bo`yicha komissiyasiga yuborilmagan.
Sudlar tomonidan ushbu holatlar e`tiborga olinmagan.
UChINChIDAN, O`zbekiston Respublikasi Shaharsozlik norma va qoidalari ShNK 2.07.01-03* Shaharsozlik, shahar va qishloq aholi punktlari hududlarini rivojlantirish va qurilishni rejalashtirish, 21.1-bandi talabida ko`p xonadonli turar-joy uylarining uzun tomonlari o`rtasidagi masofalar quyidagicha qabul qilinishi lozimligi, balandligi 4-5 qavatli bo`lgan turar joy uylari uchun 25-30 metrdan kam bo`lmagan, yashash xonalarida derazalari bo`lgan ushbu binolarning uzun tomonlari va yon tomonlari uchun 10 m.dan kam bo`lmagan oraliq masofalar belgilab qo`yilganligiga izoh sifatida mavjud mavzelarning ko`p xonadonli binolari oralig`ida, maxsus bino va inshootlardan (sport maydonlari, bolalar o`yin maydonchalari, kiyim-kechak quritish maydonchalari, avtomobillarning vaqtinchalik to`xtash joylari) tashqari, har qanday boshqa maqsadli ob`ektlarni joylashtirishga yo`l qo`yilmasligi belgilangan.
Biroq, ushbu ShNK qoidalariga rioya qilinmagan holda “Building and Supplies” MChJga ko`p qavatli turar-joy qurish uchun 0,50 ga er maydoni ajratib berilganligi holati sudning e`tiboridan chetda qolgan.
Sud qarorlariga nisbatan Bosh prokuratura tomonidan nazorat tartibida keltirilgan protest Oliy sud Ma`muriy ishlar bo`yicha sudlov hay`ati tomonidan ko`rib chiqilib, 21.05.2020 yilda quyi instansiya sudi qarorlari bekor qilinib, fuqaro O.Pyanovskaya va boshqalarning arizasini qanoatlantirish haqida yangi qaror qabul kilindi.
Bosh prokuraturaning protesti asosida fuqarolarning buzilgan huquqlari tiklandi.
