Bosh prokuratura boshqarma prokurori Murodulla Tursunmetovning ma`lum qilishicha, o`zbek tiliga rasman davlat tili maqomi berilganiga 30 yildan ziyod vaqt o`tgan bo`lsada, hanuzgacha ish hujjatlarini rus tilida yuritish holatlariga chek qo`yilmagan.
Bunday holatlar huquqiy hujjatlarni davlat tilida qabul qilinishi haqidagi talablarni buzish holatlariga ham barham berilmagan.
-- Xususan, Adliya vazirligidan vazirlik va idoralarning davlat tilida yozilmagan 242 ta idoraviy normativ - huquqiy hujjatlari davlat ro`yxatidan o`tkazilganligi, vazirlik va idoralar hamda ularning quyi tizimlarida ichki idoraviy buyruq va farmoyishlarni qabul qilishda 1 149 ta holatda hujjatlarni davlat tilida qabul qilmaslik holatlariga yo`l qo`yilgan.
Shuningdek, qonun talabiga ko`ra, hisob - kitob, statistika va moliya hujjatlari davlat tilida yuritilishi lozim bo`lsada, hozirda davlat byudjetidan moliyalashtiriladigan vazirlik va idoralarda buxgalteriya, hisob - kitob ishlarini yuritish “UzASBO” elektron dasturi orqali to`liq rus tilida yuritilmoqda.
Ayrim holatlarda ish hujjatlarini yuritishda o`zbek tilining ilmiy qoidalariga rioya etilmay, ko`plab imloviy va boshqa xatolarga yo`l qo`yilayotganligi aniqlandi.
Bu borada qonun buzilishlar (5 mingdan ortiq) asosan xalq ta`limi, maktabgacha va oliy ta`lim muassasalari, bandlik, sog`liqni saqlash hamda boshqa idoralar faoliyatida aniqlangan.
