O`zbekiston va Janubiy Koreya mamlakat hududidagi erkin iqtisodiy hududlardan birida gaz balloni uskunalari ishlab chiqarishga mo`ljallangan zavodni ishga tushirishni rejalashtirmoqda, deb xabar beradi “Sputnik” nashri.
Ta`kidlanishicha, mazkur loyiha to`laligicha Janubiy Koreya tomonidan moliyalashtiriladi.
Ikki mamlakat o`rtasida mazkur loyihani hayotga tatbiq etish yuzasidan memorandum imzolangan. Ayni paytda yangi mahsulot ishlab chiqaruvchi zavodning joylashadigan o`rni va texnik-iqtisodiy asoslar muhokama qilinmoqda.
Loyihaning barcha jihatlarini ishlab chiqish 2016 yilning o`rtalarida yakunlanadi.
Yangi zavod propan va butan gazlarida ishlovchi avtomobil uchun mo`ljallangan gaz ballonlari ishlab chiqarish bilan shug`ullanadi. Kelajakda zavod mahsulotlari MDH mamlakatlariga, birinchi navbatda Rossiyaga eksport qilinishi ko`zda tutilmoqda.
