Nukusda istiqomat qilayotgan harbiy xizmatchilar oilalari bilan Xivaga sayohat qilishdi

Nukus garnizonida xizmat qilayotgan harbiy xizmatchilar oilalari bilan Xiva shahrida joylashgan hamda Markaziy Osiyodagi yirik va noyob me`moriy yodgorlik – Ichan qal`aga sayohat qilishdi. Bu haqda Shimoli-g`arbiy harbiy okrug matbuot xizmati xabar berdi.

Ta`kidlash joizki, mamlakatimizda ichki turizmni rivojlantirish orqali xalqimizning boy tarixiy merosi, betakror urf-odat va an`analari, milliy qadriyatlarimizni o`rganishga alohida e`tibor qaratilmoqda. 

Shimoli-g`arbiy harbiy okrug qo`shinlarida ham harbiy xizmatchilar va ular oila a`zolarining ma`naviyatini yuksaltirish, ularga yashab turgan hudud tarixi haqida ko`proq ma`lumot etkazish, madaniy hordiq olishini ta`minlash maqsadida Qoraqalpog`iston Respublikasi va Xorazm viloyatining tarixiy obidalari va maskanlariga sayohat uyushtirilib, ular o`rtasida ichki turizm rivojlantirilishiga hissa qo`shilyapti. 

Qadim tarix va bugungi ruh uyg`unlashgan, mahalliy va xorijlik turistlarni o`ziga chorlab kelayotgan tarixiy obidalardan biri, shubhasiz, Xiva shahridagi Ichan qal`a tarixiy-me`moriy majmuasi hisoblanadi. 

Umumiy maydoni 26 gektar bo`lgan qal`ada 54 tarixiy arxitektura yodgorligi joylashgan. Qal`ani o`rab turgan eni 5-6 metrlik devorning uzunligi 2200 metrni tashkil qiladi. YuNESKOning Umumjahon merosi ob`ektlari ro`yxatiga kiritilgan Ichan qal`a tarixiy-me`moriy majmuasiga 4 darvoza orqali kiriladi. Ularni Ota darvoza, Bog`cha darvoza, Tosh darvoza va Polvon darvoza, deb atashadi. Bugungi kunda majmuada 40 mingdan ziyod eksponat saqlanmoqda. 

Tarix va bugun bilan yuzlashgan harbiy xizmatchilar va ularning oila a`zolari turistik sayohatdan unutilmas taassurotlar olib, bu dargohlarga yana bir bor qaytib kelishni niyat qilishdi.