Ijtimoiy tarmoqlarda Toshkentda haydovchi eshakni "Spark" avtomashinasiga bog`lab, azoblab sudrab ketayotgani haqidagi video tarqaldi. Mazkur shaxsning jonivorga zo`ravonlik ishlatishi ijtimoiy tarmoq foydalanuvchilari tomonidan ayovsiz muhokama qilindi. Video:
Ushbu holatni yon-atrofda transport vositasini boshqarib kelayotgan haydovchilar ko`rib qolgan va suratga olgan. Voqeaga guvoh bo`lganlardan biri telefon kamerasiga tasvirga olingan videoni ijtimoiy tarmoqqa joyladi.
Tarmoq kuzatuvchisi bo`lgan ayol bu videoni "Mehr va oqibat" jonivorlarni himoya qilish jamiyati nodavlat tashkilotiga yubordi. NNT esa bu ayanchli holat bo`yicha surishtiruv olib borishni so`rab, Toshkent shahar IIBBga murojaat qildi. Shu tariqa IIBB xodimlari ham bu zo`ravonlik holatiga e`tibor qaratishdi.
Jonivorlarga nisbatan johillik bilan munosabatda bo`lish holatlarida aybdorlar O`zbekiston Respublikasi ma`muriy kodeksining 111 moddasiga muvofiq javobgarlikka tortiladi. Qolaversa amaldagi Yo`l harakati qoidalarida ham bunga nisbatan muayyan javobgarlik belgilangan.
Hozirda jonivorga azob bergan haydovchining shaxsi aniqlangan, surishtiruv ishlari olib borilmoqda.
