Olmazor tumanida yashovchi B.S. ismli erkak A.G. ismli ayoldan uning yarim yalang`och holda raqsga tushgani olingan video lavhani “internet” saytlari orqali tarqatish va uni oila a`zolariga ko`rsatib sharmanda qilmasligi uchun 50 000 AQSh dollari berishni talab qilgan. Bu haqda Bosh prokuratura matbuot xizmati ma`lum qildi.
Bosh prokuratura huzuridagi Departamentning Olmazor tuman bo`limi va Toshkent shahar IIBB tomonidan o`tkazilgan tezkor tadbirda, fuqaro B.S 6 500 AQSh dollarini tovlamachilik yo`li bilan A.G dan olgan vaqtida ashyoviy dalil bilan ushlangan.
Mazkur holat yuzasidan B.S.ga nisbatan Jinoyat kodeksining 165-moddasi 3-qismi bilan jinoyat ishi qo`zg`atilib, tergov harakatlari o`tkazilmoqda.
