Avvalroq Bosh prokuraturada Bosh prokuror N.Yo`ldoshev raisligida korrupsiya holatlari kuzatilayotgan sohalar hamda vazirlik va idoralarda buning sabab va shart-sharoitlariga bag`ishlangan idoralararo yig`ilish bo`lib o`tgani haqida xabar qilgandik. Yig`ilishda Bosh prokuror Madaniyat vazirligining ayrim mansabdorlari o`ziga xos jinoiy sxema yaratishganiga ham to`xtalgandi. O`zbekiston Respublikasi Madaniyat vaziri Ozodbek Nazarbekov Bosh prokuror tilga olgan Madaniyat vazirligidagi o`g`irlik va talon-torojlik jinoyatlariga o`z fikrini bildirdi.
- Yig`ilishda aytilgan faktlar Madaniyat vazirligi nomiga yarashmaydigan holat. Bu ishga jalb qilingan yoki bevosita ishtirokchi bo`lgan xodimlar o`sha vaqtning o`zida ishdan bo`shatilgan. Tergov xulosasiga ko`ra, yana kimlar bu ishda ishtirokchi bo`lgan bo`lsa, ularga ham chora ko`riladi.
Madaniyat vaziriligi va undagi barcha tizim, tashkilotlarida korrupsiyaning oldini olish va bu borada sohani tubdan isloh qilish borasida yordam berishlarini so`rab Bosh prokuraturaga iltimos bilan chiqqandik, rad qilmay yordam berishgani uchun katta raxmat. Shu ma`noda, barini elakdan o`tkazib, korrusion holatlarni aniqlashda Bosh prokuratura katta yordam beryapti.
Elak suvdan ko`tarilgach, korrupsion holatlarni oldini olish va bartaraf qilish bo`yicha birin-ketin tizim ishlab chiqamiz. Nazarimda, madaniyat yo`nalishida ko`proq profilaktika bilan shug`ullanishimiz kerak. Zero, madaniyat xodimlari barchaga o`rnak bo`lishi lozim. Bosh prokuror tilga olgan holatlar esa madaniyat xodimlariga mutlaqo yarashmaydigan holatlar. Bu bo`yicha odob-ahloq normalarini ishlab chiqdik va hududlarga tarqatdik. Shunday targ`ibot ishlari orqali ko`p natijalarga erishamiz, oldimizga katta maqsadlarni reja qilganmiz.
