“Darakchi”ning “Iste`molchi huquqi” loyihasi doirasida Iste`molchilar huquqlarini himoya qilish agentligi bilan hamkorlikda fuqarolarning muammolarini o`rganish ishlari davom etmoqda.
Bugungi kunda tahririyat telegram kanaliga murojaatchilar tomonidan ko`plab maktublar kelib tushmoqda. Jumladan, Qashqadaryo viloyati Qarshi shahridan Mo`min Xolmurodov “aqlli hisoblagich” bilan bog`liq yuzaga kelayotgan muammolar to`g`risida bizga murojaat qildi.
–Bir o`zim yashayman. Muzlatkich, havo almashtiruvchi apparat va uchta chiroq bor uyda. Faqatgina muzlatkichim qishin-yozin ishlaydi. Bularni sizga aytishimdan maqsad, avval hisoblagichim plastikli edi. Puli tugasa, o`chardi. Pul to`lab yoqtirardim.
Yil oxirida plastikdan foydalanmaydigan hisoblagich o`rnatishdi. Boshida 125 000 so`m to`lov qildim. Shu 6 oyga etadi, deb o`ylabman, chunki oxirgi paytda 250 000 so`mgacha to`layotgandim. Ammo men qo`ygan pul 3 oyga etdi, xolos. Yana meni qarzdor ham qilib qo`yishdi. Hayronman, pulni hisoblagich o`g`irlayaptimi? – deydi Mo`min Xolmurodov.
Ushbu murojaatni o`rganish maqsadida Iste`molchilar huquqlarini himoya qilish agentligi mutaxassislari bilan hamkorlikda murojaatchining uyiga borib, surishtiruv o`tkazildi. O`rganish natijasida qayta hisob-kitob ishlari olib borildi va iste`molchining qarzdor emasligi aniqlandi. Video:
Sizning ham iste`molchilik huquqlaringiz buzilyaptimi? Unda @darakchipochta manzilimizga murojaat qiling. “Darakchi” gazetasi har doim sizni tinglashga va sizga amaliy yordam berishga tayyor!
Mohinur RUSTAMOVA
