Buxoro viloyati davlat sanitariya-epidemiologiya nazorati boshqarmasi boshlig`i karantin qoidalariga rioya qilinmaganligi holati uchun jarima tayinlamaslik evaziga 400 dollar va 500 ming so`m pora olayotganda ushlandi.
Buxoro viloyati davlat sanitariya-epidemiologiya nazorati boshqarmasi boshlig`i pora olayotganida ushlandi. Bu haqda viloyat IIB matbuot xizmati xabar qilmoqda.
Ma`lum qilinishicha, 7 noyabr kuni tezkor tadbir o`tkazilgan. Buxoro viloyati davlat sanitariya-epidemiologiya nazorati boshqarmasi boshlig`i Q.R. o`z xizmat mavqeidan foydalangan holda Buxoro shahridagi “Jamila Jahoni Lazzat Omad” MChJ rahbari Q.M.dan karantin qoidalariga rioya qilinmaganligi holati uchun jarima tayinlamaslik evaziga pul talab qilgani aniqlangan.
So`ngra u tamagirlik yo`li bilan kimyoviy ishlov berilgan 400 dollar va 500 ming so`m naqd pullarni o`zining xizmat xonasida pora tariqasida olayotgan vaqtida jinoyat ustida ushlangan.
Ushbu holat bo`yicha JKning tegishli moddasi bilan jinoyat ishi qo`zg`atilgan. Hozirda dastlabki tergov harakatlari olib borilmoqda.
