2020 yilning 18 noyabr kuni soat 21:20 larda Shahrisabz shahar “A.Temur” xiyoboniga kirishdagi 3 ta asosiy yo`l chetida o`rnatilgan avtotransport vositalarini kirishini taqiqlovchi yo`l belgilari o`rnatilganligiga qaramasdan Shahrisabz shahrining “Zingiron” MFYda yashovchi N.N., “Qushxona” MFY da yashovchi S.A., “Navro`z” MFYda yashovchi N.A. va “Qo`shxovuz” MFYda yashovchi A.S.lar boshqaruvida bo`lgan avtotransport vositalarida xiyobon hududiga piyodalar yo`lakchasi orqali kirgan. Bu haqda Qashqadaryo viloyati IIB AXborot xizmati xabar bermoqda.
Ma`lum bo`lishicha, ular dastlab, Oqsaroy tarixiy yodgorligi, so`ngra Amir Temur haykalining old qismidagi zinalarga avtomobillarning orqa g`ildiragini chiqarib, transport vositalari yordamida xavfli manyovrlarni amalga oshirib, jamoat tartibini va fuqarolaraning osoyishtaligini buzishgan.
Jamiyatda yurish-turish qoidalarini qasddan mensimasdan huquqbuzarlik sodir etganligi holati xiyobon hududida o`rnatilgan kuzatuv kamerlari orqali aniqlangan.
Ushbu holat yuzasidan Qashqadaryo viloyati IIB Xavfsiz turizmni ta`minlash boshqarmasi YHXG YPX inspektorlari Sh.Nosirov va N.Xo`jaevlar tomonidan yo`l xarakati qoidalarining 3.1 taqiqlovchi belgisiga amal qilmaganligi sababli fuqarolarga nisbatan O`zbekiston Respublikasining Ma`muriy javobgarlik to`g`risidagi kodeksining tegishli moddalari bilan ma`muriy bayonnomalar rasmiylashtirildi, deyiladi xabarda.
