BMT bosh kotibi Antoniu Guterrish davlatlarning pandemiyaga nisbatan tartibsiz reaksiyasini tanqid qildi.
Koronavirus pandemiyasining ijtimoiy-iqtisodiy ta`siri juda katta bo`ldi va bu ta`sir doirasi hali -hamon kengayib bormoqda. Dunyo 80 yil ichidagi eng katta iqtisodiy inqirozga duch kelishi mumkin. Guterrish bu haqda Nobel mukofoti forumida ma`lum qildi.
«Biz so`nggi sakson yil ichidagi eng kuchli global resessiya oldida turibmiz. O`ta qashshoqlik va ocharchilik tahdidi kuchaymoqda», - deya ogohlantirdi u. Bu holatga «pandemiya tufayli yaqqol ko`ringan jamiyatdagi tengsizlik hamda adolatsizlik» sabab bo`lgan.
Guterrishning ta`kidlashicha, hech qanday emlash etkazilgan zararni bartaraf eta olmaydi. BMT bosh kotibi sodir bo`layotgan voqealarni global tahdid deb atab, unga qarshi mamlakatlar birgalikda javob ishlab chiqmagani, Jahon sog`liqni saqlash tashkiloti (JSST) esa infeksiyaga qarshi kurashish uchun barcha kerakli ma`lumotlarni taqdim etganini bildirdi.
Pandemiyaga reaksiya tarqoq va tartibsiz bo`ldi, dedi Guterrish. «Mamlakatlar, mintaqalar va hatto shaharlar eng zaruriy vositalarni etkazib berish va ilg`or tibbiy xizmat ko`rsatish bo`yicha raqobatlashdi», - dedi Guterrish va COVID-19’ga qarshi vaksinalarni tarqatishda bu vaziyat takrorlanishining oldini olishga chaqirdi.
Dekabr oyi boshida AQSh Milliy iqtisodiy tadqiqotlar byurosi (NBER) pandemiyaning globallashuv va savdoga ta`siri to`g`risida hisobot taqdim etdi. Tadqiqot muallifi, Harvard universitetida iqtisod professori Pol Antrasning ta`kidlashicha, COVID-19 bir xil bo`lmagan zarar etkazgan. Ya`ni, aholining kam ta`minlangan qismi eng ko`p jabr ko`rdi, bu esa savdoda ochiqlik siyosatini qo`llab-quvvatlashni susaytirishi mumkin, dedi u.
