БМТ бош котиби Антониу Гутерриш давлатларнинг пандемияга нисбатан тартибсиз реакциясини танқид қилди.
Коронавирус пандемиясининг ижтимоий-иқтисодий таъсири жуда катта бўлди ва бу таъсир доираси ҳали -ҳамон кенгайиб бормоқда. Дунё 80 йил ичидаги энг катта иқтисодий инқирозга дуч келиши мумкин. Гутерриш бу ҳақда Нобел мукофоти форумида маълум қилди.
«Биз сўнгги саксон йил ичидаги энг кучли глобал рецессия олдида турибмиз. Ўта қашшоқлик ва очарчилик таҳдиди кучаймоқда», - дея огоҳлантирди у. Бу ҳолатга «пандемия туфайли яққол кўринган жамиятдаги тенгсизлик ҳамда адолатсизлик» сабаб бўлган.
Гутерришнинг таъкидлашича, ҳеч қандай эмлаш етказилган зарарни бартараф эта олмайди. БМТ бош котиби содир бўлаётган воқеаларни глобал таҳдид деб атаб, унга қарши мамлакатлар биргаликда жавоб ишлаб чиқмагани, Жаҳон соғлиқни сақлаш ташкилоти (ЖССТ) эса инфекцияга қарши курашиш учун барча керакли маълумотларни тақдим этганини билдирди.
Пандемияга реакция тарқоқ ва тартибсиз бўлди, деди Гутерриш. «Мамлакатлар, минтақалар ва ҳатто шаҳарлар энг зарурий воситаларни етказиб бериш ва илғор тиббий хизмат кўрсатиш бўйича рақобатлашди», - деди Гутерриш ва COVID-19’га қарши вакциналарни тарқатишда бу вазият такрорланишининг олдини олишга чақирди.
Декабр ойи бошида АҚШ Миллий иқтисодий тадқиқотлар бюроси (NBER) пандемиянинг глобаллашув ва савдога таъсири тўғрисида ҳисобот тақдим этди. Тадқиқот муаллифи, Ҳарвард университетида иқтисод профессори Пол Антраснинг таъкидлашича, COVID-19 бир хил бўлмаган зарар етказган. Яъни, аҳолининг кам таъминланган қисми энг кўп жабр кўрди, бу эса савдода очиқлик сиёсатини қўллаб-қувватлашни сусайтириши мумкин, деди у.
