«Avvaldan tez-tez shamollashga moyilman. Ayniqsa, kuz-qish mavsumida gripp, tumov, tomoq og`riqlari ko`p bezovta qiladi. O`tgan yili sistit bo`lgandim. Eshitishimcha, men kabi salga shamollaydiganlarda sistit qaytalanishi mumkin ekan. Shunga aniqlik kiritsangiz»
Odina Salimova, Yuqori Chirchiq tumani
Mavzu yuzasidan oliy toifali shifokor-urolog, dosent Ulug`bek Xudoyberganov ma`lumot beradi.
Sistit ba`zilar uchun oddiy xastalikdek tuyuladi. Hatto kuz-qish mavsumi uchun sodir bo`lishi kerak bo`lgan kasalliklar qatoriga kiritilishi ham rost. Aslida esa mazkur xastalik jiddiy yondashuvni talab etadigan va mavsum tanlamas xastalikdir.
QANDAY YuZAGA KELADI?
Tibbiyotda sistit peshob yo`li va peshob qopchasi yallig`lanishi bilan kechadigan infeksion turdagi kasallik deyiladi. Xastalik turli bakteriyalar, virus, xlamidioz, zamburug`lar va ichak tayoqchalari ta`sirida yuzaga keladi. Ba`zan kasallik sababchisi infeksiya emas, jinsiy a`zo va buyrak faoliyati o`zgarishlari, yallig`lanishlari bo`lishi ham mumkin. Aniqlanishicha, sistit erkaklarga nisbatan ayollarda ko`proq uchraydi. Xastalik gormonal buzilishlar, vitamin etishmasligi, sovqotish, oyoqdan zax o`tishi, peshob yo`llari yallig`lanishi sababli ham avj olishi mumkin.
Belgilari
Har bir organizm individual tuzilganiligini hisobga olsak, kasallik belgisi turlicha boshlanishi mumkin. Engil turi qovuq og`rishi, peshob ajralish vaqti jiddiy bo`lmagan yoxud vaqti-vaqti bilan kuzatiladigan bezovtaliklar bilan xarakterlanadi. O`tkir turida esa qovug`da sanchiqli og`riqlar, tez-tez hojatga borish, peshob bo`shalishi paytida achishish kabilar kuzatiladi.
Nega qaytalanadi?
Birinchi marta sistit bilan to`qnash kelayotgan bo`lsangiz, og`riqsizlantiruvchi preparat qabul qiling-da, shifokor huzuriga yo`l oling. Bir qancha tahlil tekshiruvlaridan so`ng kasallik sababi aniqlanib, zarur muolaja turi tanlanadi. Chunki o`zingizcha davo qilishingiz, noto`g`ri muolaja, salgina sovuqsirash yoki immunitet sustlashishi yuz bersa ham sistit xurujlari qaytalanishi mumkin.
MUOLAJA DAVOMIY BO`LSIN
Kasallik turi va darajasiga ko`ra shifokor tomonidan antibiotik, immunitetni mustahkamlovchi preparatlar hamda uy sharoitida bajarish mumkin bo`lgan vannalar tavsiya etiladi.
Muolaja vaqti siydik ajralishini faollashtirish uchun ko`proq suyuqlik ichish lozim. Masalan, na`matak, ko`k choy, jo`xori popugidan tayyorlangan damlamalar ayni muddao.
Taomnomadan achchiq, sho`r, nordon eguliklarni cheklab turasiz. Oyoq va bel sohasini issiq tutib, uzoq vaqt bir joyda o`tirmaslik, peshob xaltasi to`lib qolmasligini nazorat qilishingiz lozim.
