Bir muddat avval taniqli estrada xonandasi Samarqanddagi liseyning birinchi kursini endigina tamomlagan, voyaga etmagan qizning nomusiga tekkani haqida xabar qilingan edi. Shundan so`ng, ushbu shaxs estrada xonandasi Jasur Umirov degan taxminlar paydo bo`lib, holat yuzasidan qayta tekshiruv tayinlangani va jinoyat ishi ochilgani xabar qilindi.
Ayni paytda Samarqand viloyati prokuraturasining xabar berishicha, voyaga etmagan Sh.M.ni xonanda J.U. nomusiga tekkanligi holati yuzasidan to`plangan hujjatlar bo`yicha 09.10.2020 yilda Samarqand viloyati IIB huzuridagi Tergov boshqarmasi tomonidan O`zbekiston Respublikasi JKning 118-moddasi 1-qismi bilan jinoyat ishi qo`zg`atilib, hozirgi kunda ish yuzasidan dastlabki tergov harakatlari olib borilmoqda.
Voyaga etmagan Sh.M. advokati M.Rustamova bilan birgalikda viloyat prokuraturasiga murojaat etishib, J.U.ga nisbatan bo`lgan jinoyat ishi tergov harakatlaridan noroziliklarini bayon etishgan.
Murojaat Samarqand viloyat prokurori R.Masharipov tomonidan o`rganilib, ariza muallifi advokati M.Rustamova ishtirokida o`zi rahbarligida viloyat prokuraturasi va IIB mas`ullari ishtirokida 2020 yil 18 dekabr kuni qabul qilinib, jinoyat ishi viloyat prokuraturasi tomonidan nazoratga olinganligi va tez kunlarda qonuniy qaror qabul qilishi ta`kidlandi.
Shundan so`ng, ishda to`plangan dalillar asosida J.U.ga nisbatan 118-moddasi 3-qismi “a” bandi bilan ayb e`lon qilinib, sudning 21.12.2020 yildagi ajrimiga asosan unga nisbatan qamoq ehtiyot chorasi qo`llanildi.
Jinoyat ishi tergovi viloyat prokurori R.Masharipov tomonidan alohida nazoratga olindi, deyiladi xabarda.
