2020 yilning dekabr oyida 22 yoshli M.R. Buxoro shahrida joylashgan kafelardan birida ofisiant bo`lib ishlab yurgan vaqtida ushbu kafega mijoz sifatida kelgan fuqaro F.E. bilan tanishib qolgan.
M.R. suhbat davomida F.E.ga homilador ekanini, to`rt oylik homilasi borligi va moddiy jihatdan qiynalayotgani, kelgusida tug`ilajak farzandini moddiy tomondan ta`minlay olmasligini, farzandini dunyoga keltirgandan so`ng sotish niyati borligini ma`lum qilgan hamda F.E.ga to`rt oylik homilasini sog`lom holda tug`ib, 50 000 000 so`m evaziga sotishni taklif qilib, oldindan avans tariqasida 25 000 000 so`m so`ragan.
IIV huzuridagi Tergov departamentining xabariga ko`ra, joriy yilning 6 yanvar kuni soat 19:00da Buxoro shahar A.Jome` ko`chasida joylashgan «Al-Pari» restorani oldida M.R. fuqaro F.E.dan 20 000 000 so`m va 500 AQSh dollari miqdoridagi pullarni olgan vaqtida ashyoviy dalillar bilan ushlangan.
Mazkur holat yuzasidan Buxoro shahar IIO FMB huzuridagi Tergov bo`limi tomonidan M.R.ga nisbatan Jinoyat kodeksining 25, 135-moddasi 1-qismi (odam savdosiga suiqasd) bilan jinoyat ishi qo`zg`atilgan.
Dastlabki tergov jarayonida M.R. gumon qilinuvchi tariqasida ishda ishtirok etishga jalb qilingan. Hozirda mazkur jinoyat ishi yuzasidan tergov harakatlari olib borilmoqda.
