Bosh prokuratura huzuridagi Departamentning Yashnobod tumani bo`limi tomonidan fuqaro Q.M. va boshqalarning murojaatiga asosan tergovga qadar tekshiruv o`tkazildi. Bu haqda Bosh prokuratura matbuot xizmati Darakchiga xabar bermoqda.
Fuqaro M.A. va S.S.lar oldindan til biriktirib, Q.M. va boshqalarning ishonchiga kirib, ularni Evropa Davlatlariga oyiga 2000-3000 AQSh dollari to`lanadigan ishga yuborish hamda ishchi vizalarini olib berish evaziga jami 5 500 AQSh dollarini firibgarlik yo`li bilan qo`lga kiritganliklari aniqlangan.
Bundan tashqari, S.S. va boshqalar jinoiy harakatlarini davom ettirib, 2019 yilning noyabr oyida 14 nafar fuqaroni Ukraina Davlatining Kiev shahrida oyiga 500 AQSh dollari oylik to`lanadigan qurilish ishlarida ishlab, keyin Evropa davlatlariga ishga o`tkazib berishga ko`ndirib, shu yo`l bilan ularning ishonchini suiiste`mol qilib, Kievga etib borishi uchun 2019 yilning 29 noyabrida aviachipta olishga erishib, Kievdagi qurilish firmasida ularning pasportini olib qo`yib, 75 kun davomida moddiy jihatdan o`ziga qaram qilgan holda og`ir mehnat sharoitlarida ishlatib, 17 500 AQSh dollari miqdoridagi ish haqlarini bermasdan aldab kelishgan.
Shundan so`ng ushbu fuqarolarni Belorussiya davlatining Gomel shahriga va Rossiya Federasiyasining Moskva shahriga olib borishib, go`yoki shu erdan Evropaga ishchi vizasini olib berishi haqida takror aldashib, ularning mazkur davlatlarda ishsiz yurib, turli qiyinchiliklarga duchor bo`lishiga sababchi bo`lishib, fuqarolarning qonun bilan qo`riqlanadigan manfaatlariga zarar etkazishgan.
Mazkur holatlar yuzasidan fuqarolar M.A., S.S. va boshqalarga nisbatan Jinoyat kodeksining 168-moddasi 2-qismi va 135-moddasi 2-qismi bilan jinoyat ishi qo`zg`atilib, tergov harakatlari o`tkazilmoqda.
