Ijtimoiy tarmoqlarda voyaga etmagan U.U.Xoshimovning ehtiyotsizligi oqibatida kuyib vafot etganligi haqida xabarlar va video lavhalar tarqaldi.
Holat yuzasidan Namangan viloyat prokuraturasi munosabat bildirdi.
Ma`lum qilinishicha, Davlatobod tumani maktabgacha ta`lim bo`limi tasarrufidagi 31-sonli ko`p tarmoqli ixtisoslashtirilgan maktabgacha ta`lim tashkilotida tarbiyalanayotgan, 2015 yilda tug`ilgan Xoshimov Ulug`bek Umarxon o`g`li 05.02.2021 yil kuni o`zining ehtiyotsizligi natijasida muassasa issiq suv tizimidagi issiq suv jumragini ochib yuborishi natijasida 2-darajali 65% kuyish tan jarohatini olib, viloyat ko`p tarmoqli bolalar shifoxonasiga yotqizilgan.
Voyaga etmagan U.U.Xoshimov 27-fevral 2019 yildan buyon ushbu muassasada aqliy rivojlanishi orqada qolish tashxisi bilan tarbiyalanayotganligi ma`lum bo`lgan.
Olib borilgan tibbiy muolajalarga qaramasdan voyaga etmagan fuqaro U.Xoshimov kuyish natijasida olgan tan jaroxatlari oqibatida 2021 yil 24 fevral kuni vafot etgan.
Namangan viloyat STEBning 24.02.2021 yilgi 70-sonli xulosasida, marhum U.Xoshimovning o`limi - qaynoq suvdan bosh, yuz va tananing boshqa qismlarining 2,3-darajali 70% kuyishi asorati natijasida poliorgan yurak qon-tomir etishmovchiligi natijasida o`limga olib kelganligi va murda tanasida kuyishdan boshqa tan jarohatlari aniqlanmaganligi ko`rsatilgan.
Mazkur holatga tergov yo`li bilan baho berish zaruriyati tug`ilganligi sababli, O`zb. Res. JKning 116-moddasi 3-qismi, 207-moddasi 1-qismi bilan jinoyat ishi qo`zg`atilib, viloyat prokuraturasi tomonidan tergov harakatlari olib borilmoqda.
Natijalari haqida ma`lum qilinadi.
