Toshkent shahar IIBB axborot resurslarida xabar berilganidek, 49 yoshli Sh.Ozodaga ichki ishlar organlari xodimlari tomonidan tan jarohati etkazilgani haqida Internet tarmog`ida tarqalayotgan xabar haqiqatdan yiroqdir. Ayblanuvchi ayolning o`g`li tomonidan qilingan murojaati yuzasidan berilgan xabarda, uning onasi, Sh.Ozoda hamda 26 yoshli B.Dilshodbek dastlabki tergov davomida to`plangan dalillarga asosan jinoyat ishida ayblanuvchi tariqasida jalb etilgani ma`lum qilingan. Shunga qaramasdan, shu kunlarda ayblanuvchi ayolning opasi Sh.Orzigul asossiz ayblovlar bilan videmurojaat tarqatdi.
Ma`lum qilamizki, Sh.Ozodaning yaqinlari tomonidan qilingan murojaatlar ko`rib chiqildi. Chilonzor tumani prokuraturasi tomonidan tergovga qadar tekshiruv o`tkazilib, tekshiruv davomida ichki ishlar organlari xodimlarining ayblanuvchiga nisbatan xatti-harakatlari o`rganildi, sud-tibbiy ekspertiza tayinlandi. Biroq tergovga qadar tekshiruv natijasiga ko`ra ayblanuvchi ayolning yaqinlarining gaplari o`z tasdig`ini topmadi.